સુરત શહેર અને તેની આસપાસના ઔદ્યોગિક વિસ્તારોમાં શ્રમજીવી અને યુવા વર્ગને નશાના રવાડે ચડાવવા માટે બહારના રાજ્યોમાંથી ટ્રેનો મારફતે થતી નશીલા પદાર્થોની તસ્કરી પર સુરત રેલવે પોલીસે સર્જિકલ સ્ટ્રાઈક કરી છે. સામાન્ય રીતે પોલીસને ચકમો આપવા માટે સ્મગલરો હવે મહિલાઓનો સહારો લઈ રહ્યા છે, પરંતુ રેલવે પોલીસની સતર્કતાના કારણે આ હથકંડો પણ ફ્લોપ સાબિત થયો છે.
શંકાસ્પદ હિલચાલ પરથી ઓપરેશન સક્સેસ
સુરત રેલવે પોલીસની ટીમને મુસાફરોની સુરક્ષા ચેકિંગ દરમિયાન ગુપ્ત બાતમી મળી હતી કે, એક મહિલા અને એક પુરુષ મોટી માત્રામાં કોઈ પ્રતિબંધિત નશીલો પદાર્થ લઈને સુરત રેલવે સ્ટેશનની બહાર નીકળ્યા છે અને કોઈ વાહનની રાહ જોઈ રહ્યા છે. આ બાતમીના આધારે તુરંત એક્શનમાં આવેલી રેલવે પોલીસની ટીમે સ્ટેશનના એક્ઝિટ ગેટ બહાર વોચ ગોઠવી હતી. ત્યાં બાતમીવાળા વર્ણન મુજબના બંને શખ્સો શંકાસ્પદ હાલતમાં મોટા થેલા/બેગ સાથે મળી આવ્યા હતા. પોલીસે જ્યારે તેમની અટકાયત કરીને બેગની તલાશી લીધી, ત્યારે અંદરથી ખાખી કલરના પેકિંગમાં લપેટાયેલો ગાંજાનો જંગી જથ્થો મળી આવ્યો હતો.
