સુરત શહેરમાં સાયબર ક્રાઇમના કિસ્સાઓ દિન-પ્રતિદિન ચિંતાજનક રીતે વધી રહ્યા છે. આશ્ચર્યજનક વાત એ છે કે હવે સાયબર માફિયાઓથી પોલીસ કર્મચારીઓ પણ સુરક્ષિત રહ્યા નથી. સુરતમાં ફરજ બજાવતા એક પોલીસ કોન્સ્ટેબલ જ સાયબર ઠગોની જાળમાં ફસાઈને ઠગાઈનો ભોગ બન્યા છે. પોલીસકર્મી જ સાયબર ફ્રોડમાં ફસાવવાને કારણે સુરત પોલીસ બેડામાં ભારે ચકચાર મચી જવા પામી છે.
વેડિંગ કાર્ડની APK ફાઇલ ડાઉનલોડ કરતાં રૂ.1 લાખ ગાયબ
આ ઘટના અંગે મળતી વિગતો અનુસાર, પોલીસ કોન્સ્ટેબલના મોબાઈલ પર લગ્નની પત્રિકા (વેડિંગ કાર્ડ) નામે એક ફાઇલ અથવા લિંક મોકલવામાં આવી હતી. આ ફાઇલ વાસ્તવમાં એક જોખમી APK (Android Package) ફાઇલ હતી. જેવી કોન્સ્ટેબલે લગ્નનું કાર્ડ સમજીને તે ફાઇલ ડાઉનલોડ કરી, કે તરત જ તેમનો ફોન હેક થઈ ગયો હતો અને હેકર્સે તેમના બેંક ખાતામાંથી તબક્કાવાર રૂપિયા 1 લાખની રકમ ગાયબ કરી દીધી હતી.