સુરત શહેરના પોશ ગણાતા વેસુ વિસ્તારમાં રહેતા અને કાપડનો વેપાર કરતા એક વેપારી સાયબર ઠગોની જાળમાં ફસાયા છે. ફોરેક્સ ટ્રેડિંગમાં ઊંચા વળતર અને મોટા નફાની લાલચ આપીને અજાણ્યા સાયબર ક્રિમિનલે વેપારી પાસેથી તબક્કાવાર રૂ. 58 લાખની માતબર રકમ વિવિધ બેંક ખાતાઓમાં ટ્રાન્સફર કરાવી ઓનલાઈન ઠગાઈ આચરી છે.

ટેલિગ્રામ પર 'શ્રુતિ શેટ્ટી' નામે સંપર્ક કરી જાળ પાથરી

ઘટનાની વિગત મુજબ, ફરિયાદી કાપડ વેપારીનો ટેલિગ્રામ એપ્લિકેશન પર 'શ્રુતિ શેટ્ટી' નામની એક યુવતીએ સંપર્ક કર્યો હતો. સાયબર ઠગે પોતાની જાળમાં ફસાવવા માટે વેપારીને ફોરેક્સ ટ્રેડિંગમાં નાણાંનું રોકાણ કરવાથી ટૂંકા સમયમાં મોટો નફો મેળવવાની મોહક લાલચ આપી હતી. વેપારી ઠગની વાતોમાં આવી ગયા હતા અને અતિશય નફો કમાવવાની આશામાં આરોપીએ દર્શાવેલા અલગ-અલગ બેંક એકાઉન્ટ્સમાં અલગ અલગ રીતે કુલ રૂ. 58 લાખ ટ્રાન્સફર કરી દીધા હતા.

રકમ મેળવ્યા બાદ સંપર્ક વિહોણો થયો, સાયબર ક્રાઈમમાં ફરિયાદ

વેપારીએ રૂ. 58 લાખ ટ્રાન્સફર કર્યા બાદ જ્યારે પોતાના નાણાં કે નફો પરત મેળવવાનો પ્રયાસ કર્યો ત્યારે આરોપીએ પોતાનો મોબાઈલ ફોન બંધ કરી દીધો હતો અને તમામ સંપર્ક તોડી નાખ્યા હતા. પોતાની સાથે મોટી છેતરપિંડી થઈ હોવાનો અહેસાસ થતાં વેપારીએ તાત્કાલિક સુરત સાયબર ક્રાઇમ સેલ પોલીસ સ્ટેશનનો સંપર્ક કરી સત્તાવાર ફરિયાદ નોંધાવી છે. પોલીસે ટેકનિકલ સર્વેલન્સ અને બેંક એકાઉન્ટની વિગતોના આધારે ગુનો નોંધી તપાસ ચાલુ કરી છે.

આ પણ વાંચો : Surat: ક્રાઈમ બ્રાન્ચે MD ડ્રગ્સ સાથે બે પેડલર ઝડપી લીધા, ઇ-સ્કૂટર અને વજન કાંટો જપ્ત!