સુરતના ભેસ્તાન વિસ્તારમાં આવેલી નગર પ્રાથમિક શિક્ષણ સમિતિની શાળામાંથી એક શરમજનક ઘટના સામે આવી છે. વિદ્યાના ધામ સમાન શાળાના વર્ગખંડમાં જ દારૂની મહેફિલ યોજાઈ હોવાનો વિડિયો સોશિયલ મીડિયા પર વાયરલ થતાં શિક્ષણ જગતમાં ભારે ચકચાર મચી ગઈ છે. આ કરતૂત કોઈ બહારના તત્વોએ નહીં પરંતુ શાળાની સુરક્ષા માટે તૈનાત સિક્યુરિટી ગાર્ડે જ કરી હોવાનું ખુલ્યું છે.
મિત્રોને બોલાવીને શાળાના કલાસરૂમમાં જ દારૂની મહેફિલ જમાવી
મળતી માહિતી મુજબ, રવિવારની રજાના દિવસે શાળાના ગ્રાઉન્ડમાં ક્રિકેટ રમી રહેલા સ્થાનિક યુવાનોને સુરક્ષા કર્મીએ બહાર કાઢી મૂક્યા હતા. ત્યારબાદ તેણે પોતાના મિત્રોને બોલાવીને શાળાના કલાસરૂમમાં જ દારૂની મહેફિલ જમાવી હતી. શાળા પરિસરમાં દારૂની બાટલીઓ સાથેની આ પાર્ટીનો વિડિયો વાયરલ થતાં મનપાના શિક્ષણ તંત્રમાં દોડધામ મચી ગઈ હતી.