પવિત્ર નવરાત્રી મહોત્સવ દરમિયાન સુરત શહેરમાંથી ગરબા પ્રેમીઓ માટે અત્યંત નિરાશાજનક અને ચોંકાવનારી ઘટનાઓ સામે આવી રહી છે. શહેરના પ્રખ્યાત ગણાતા 'OG નવરાત્રી' અને 'સુવર્ણ નવરાત્રી' જેવા બે મોટા આયોજનોમાં ભારે હોબાળો મચી ગયો છે. આયોજકોની વ્યાપારી માનસિકતા અને નબળા સંચાલનને કારણે ગરબા રમવા આવેલા હજારો ખેલૈયાઓ અને યુવતીઓને ભારે મુશ્કેલીઓનો સામનો કરવો પડ્યો છે, જેના કારણે ગરબા ગ્રાઉન્ડ રણમેદાનમાં ફેરવાઈ ગયા હતા.
OG નવરાત્રીમાં એન્ટ્રી ન મળતા બોક્સ ઓફિસ અને બેરિકેડ તોડી પાડ્યા
'OG નવરાત્રી' આયોજનમાં કથિત રીતે ગ્રાઉન્ડની ક્ષમતા કરતા પણ વધુ સંખ્યામાં પાસ અને ટિકિટોનું વેચાણ કરી દેવામાં આવ્યું હોવાનો ગંભીર આક્ષેપ ખેલૈયાઓ દ્વારા કરવામાં આવ્યો છે. મોટી સંખ્યામાં પાસ વેચી દેવાયા બાદ જયારે ખેલૈયાઓ ટાઇમે ગ્રાઉન્ડ પર પહોંચ્યા ત્યારે તેમને અંદર પ્રવેશ આપવામાં આવ્યો ન હતો. લાંબી કતારોમાં ઊભા રહેવા છતાં એન્ટ્રી ન મળતા રોષે ભરાયેલા ખેલૈયાઓનો ગુસ્સો સાતમા આસમાને પહોંચ્યો હતો. ઉત્સાહમાં આવેલા યુવાનોએ આયોજકો સામે નારેબાજી કરી બોક્સ ઓફિસ અને લોખંડના બેરિકેડ તોડી પાડ્યા હતા, જેના કારણે ભારે નાસભાગ મચી ગઈ હતી.