સુરતમાં ન્યૂડ વીડિયો કોલ કરી હની ટ્રેપમાં ફસાવવાનો મામલો સામે આવ્યો હતો. આ કેસમાં પોલીસે એક યુવતી સહિત બે લોકોની ધરપકડ કરી છે. પોલીસે રોકડ સહિત 2.85 લાખનો મુદ્દામાલ જપ્ત કર્યો છે. સુરત ક્રાઈમ બ્રાંચે આરોપીઓને ઝડપીને વધુ તપાસ હાથ ધરી છે. આરોપીઓ ન્યૂડ વીડિયો વાયરલ કરવાની ધમકી આપીને પૈસા પડાવતા હતાં.
અભિષેક શેઠીયા અને હેતલ બારૈયાને પોલીસે ઝડપ્યા
સુરત ક્રાઈમ બ્રાંચના ડીસીપી ભાવેશ રોજિયાએ કહ્યું હતું કે, શહેરમાં એક યુવકને હની ટ્રેપમાં ફસાવીને 20 લાખની ખંડણી લેતા એક યુવતી સહિત બે લોકોને ઝડપી લેવાયા છે. ક્રાઈમ બ્રાંચે આરોપી અભિષેક સંજય શેઠીયા અને હેતલ બારૈયાની ધરપકડ કરી છે. તેમની પાસેથી 20 લાખ રોકડા, ત્રણ મોબાઈલ સહિત કૂલ 20.85 લાખ રૂપિયા જપ્ત કર્યા છે. પકડાયેલી મહિલા આરોપી અને ફરિયાદી ઘણા સમયથી એકબીજાના સંપર્કમાં હતાં. બંને વચ્ચે સતત વાતચીત થતી હતી અને વીડિયોકોલથી પણ વાત કરતા હતાં.
