સુરત શહેર પોલીસે સાઈબર ક્રાઈમ ક્ષેત્રે એક મોટી અને ઐતિહાસિક સફળતા મેળવતા રૂ. 125 કરોડથી વધુની રકમની ઓનલાઈન છેતરપિંડી આચરનારી શાતિર ગેંગનો પર્દાફાશ કર્યો છે. પોલીસે આંતરરાજ્ય રેકેટ સાથે સંકળાયેલા 4 મુખ્ય સાગરીતોની અટકાયત કરી છે. આ ગેંગે ટેકનોલોજીનો ગેરઉપયોગ કરીને દેશભરના હજારો નાગરિકોને પોતાની જાળમાં ફસાવીને કરોડો રૂપિયાનો ચૂનો લગાવ્યો હતો.
PNB જેવી ફેક એપ બનાવી 5,613 લોકોના ખાતા સાફ કર્યા
પોલીસ તપાસમાં બહાર આવેલા ચોંકાવનારા ખુલાસા મુજબ, આરોપીઓ પંજાબ નેશનલ બેંક (PNB) જેવી જ હૂબહૂ દેખાતી નકલી (ફેક) મોબાઈલ એપ્લિકેશન બનાવીને લોકોના ફોન હેક કરતા હતા. આ બોગસ એપ દ્વારા લોકોની બેંકિંગ વિગતો અને ઓટીપી (OTP) ચોરી કરીને ગેંગના સભ્યોએ અત્યાર સુધીમાં કુલ 5,613 નિર્દોષ લોકોના બેંક ખાતામાંથી તમામ રકમ સાફ કરી નાખી હતી.