ડાયમંડ અને ટેક્સટાઈલ નગરી તરીકે જાણીતા સુરત શહેરમાં હાલમાં રખડતા શ્વાનોનો ત્રાસ માઝા મૂકી રહ્યો છે. શહેરના વિવિધ વિસ્તારોમાં અવારનવાર શ્વાન દ્વારા નિર્દોષ નાગરિકોને નિશાન બનાવવામાં આવી રહ્યા છે, જેના કારણે લોકોનું ઘરની બહાર નીકળવું પણ મુશ્કેલ બન્યું છે. તાજેતરમાં બનેલી ઘટનાઓમાં ખટોદરાના આઝાદનગર, પાંડેસરાના ગોવાલકનગર અને પ્રેમનગર તેમજ ડીંડોલી વિસ્તારમાં શ્વાનોએ આતંક મચાવ્યો છે, જેના કારણે શહેરીજનોમાં વહીવટી તંત્ર સામે રોષ પ્રસર્યો છે.
ડીંડોલીમાં યુવક બન્યો શિકાર
પ્રાપ્ત વિગતો અનુસાર, ખટોદરા વિસ્તારમાં આવેલા આઝાદનગરમાં રમી રહેલા એક નાના બાળક પર શ્વાને અચાનક હુમલો કરી ઈજા પહોંચાડી હતી. આ જ પ્રકારે પાંડેસરાના ગોવાલકનગર અને પ્રેમનગરમાં પણ બાળકો ઘરની બહાર રમી રહ્યા હતા ત્યારે રખડતા શ્વાનોએ તેમને બચકાં ભરીને ગંભીર રીતે ઘાયલ કર્યા હતા. માત્ર બાળકો જ નહીં પરંતુ ડીંડોલી વિસ્તારમાં એક યુવક પર પણ શ્વાને હુમલો કર્યો હોવાની ઘટના સામે આવી છે. આ તમામ ઈજાગ્રસ્તોને ત્વરિત સારવાર અર્થે હોસ્પિટલ ખસેડવામાં આવ્યા છે, જ્યાં વાલીઓમાં ભારે ચિંતા જોવા મળી રહી છે.