સુરત શહેરમાં યુવાનોમાં વિદેશ જવાના ક્રેઝનો લાભ ઉઠાવી કરોડો રૂપિયા પડાવી લેતી ટોળકીઓ સક્રિય થઈ છે. શહેરના કાપોદ્રા પોલીસ મથકની હદમાં વિદેશ જવા ઈચ્છતા ૧૧ ગ્રાહકો સાથે રૂપિયા 1.17 કરોડની છેતરપિંડીની ચોંકાવનારી ફરિયાદ નોંધાઈ છે. આ હાઈપ્રોફાઈલ વિઝા કૌભાંડમાં અમદાવાદ અને લંડનમાં પોતાની ઓફિસો હોવાનો દાવો કરતો રવાણી પરિવાર મુખ્ય આરોપી તરીકે સામે આવ્યો છે.
આવી રીતે આચરવામાં આવી છેતરપિંડી
સમગ્ર ઘટનાની વિગત એવી છે કે, સુરતના સ્થાનિક ફરિયાદી (જેઓ પોતે એજન્ટ અથવા કન્સલ્ટન્ટ હોઈ શકે છે) એ લંડન જવા ઈચ્છતા ૧૧ જેટલા ગ્રાહકોના વર્ક વિઝા અને સ્ટુડન્ટ વિઝાના કામ માટે રવાણી પરિવારનો સંપર્ક કર્યો હતો. રવાણી પરિવારે લંડન સેટલ કરાવી દેવાની મોટી-મોટી વાતો કરીને તમામ ગ્રાહકોના ફાઈલ ચાર્જ અને વિઝા પ્રોસેસિંગ ફી પેટે ટુકડે-ટુકડે કુલ રૂપિયા 1,17,00,000 (એક કરોડ સત્તર લાખ) પડાવી લીધા હતા.