તાપી જિલ્લામાં લાંચ રુશ્વત વિરોધી બ્યુરો દ્વારા એક સફળ ટ્રેપ ગોઠવીને ભ્રષ્ટ અધિકારીઓ પર સપાટો બોલાવવામાં આવ્યો છે. સરકારની લોકકલ્યાણકારી યોજનાનો લાભ આપવા માટે ગરીબ ખેડૂતો પાસેથી લાંચ માંગવાના ગુનામાં ડોસવાડા સેજોના ગ્રામસેવક જીવણભાઈ ગામીત અને સોનગઢ સ્થિત બજરંગ એગ્રો એજન્સીના અક્ષય કેરલ નામના વ્યક્તિને એસીબીએ રંગેહાથ ઝડપી પાડ્યા છે.
ડાંગરના બિયારણ પેટે લાંચ માંગી હતી
મળતી વિગતો મુજબ, સરકારની નિદર્શન કીટ સહાય યોજના 2026 હેઠળ ખેડૂતોને બિયારણ ફાળવવાનું હતું. આ સરકારી સહાયની કીટ આપવાના બદલામાં ગ્રામસેવક જીવણભાઈ ગામીત દ્વારા ડાંગરના બિયારણ પેટે 300 અને જુવારના બિયારણ પેટે 350 મળીને કુલ 650ની લાંચની માંગણી કરવામાં આવી હતી. આ ભ્રષ્ટાચાર સામે એક જાગૃત નાગરિકે નમતું જોખવાને બદલે તાત્કાલિક એસીબી કચેરીનો સંપર્ક સાધીને આ અંગે વિધિવત ફરિયાદ નોંધાવી હતી.
