તાપી જિલ્લામાંથી એક અત્યંત હૃદયદ્રાવક અને દુખદ અકસ્માતના સમાચાર સામે આવ્યા છે. વ્યારા નજીક આવેલા કટાસવાણ ગામની સીમ વિસ્તારમાં મજૂરોથી ભરેલો એક ટેમ્પો અચાનક પલટી મારી ગયો હતો. આ ગંભીર માર્ગ અકસ્માતમાં વાહનમાં સવાર શ્રમિકો રસ્તા પર પટકાતા એક પુરુષ અને બે મહિલાઓ સહિત કુલ 3 વ્યક્તિઓના કમકમાટીભર્યા મોત નીપજ્યા છે. દિવાળી અને તહેવારોની મોસમ ટાણે જ શ્રમિક પરિવાર પર વજ્રઘાત થવાથી સમગ્ર પંથકમાં ભારે શોકનું મોજું ફરી વળ્યું છે.
સ્ટિયરિંગ પરથી કાબૂ છૂટતા સર્જાઈ ભયાનક દુર્ઘટના
પ્રાપ્ત વિગતો અનુસાર, આ તમામ મજૂરો ભાત (ડાંગર) કાપવાની મોસમી કામગીરી માટે ખેતરે જઈ રહ્યા હતા. સવારના સુમારે ટેમ્પોમાં બેસીને તેઓ પોતાના કામે જઈ રહ્યા હતા ત્યારે કટાસવાણ ગામની સીમ પાસે પહોંચતા જ અચાનક ચાલકે વાહનના સ્ટિયરિંગ પરથી કાબૂ ગુમાવી દીધો હતો, જેના કારણે પૂરપાટ ઝડપે જતો આ ટેમ્પો રોડની બાજુમાં પલટી ખાઈ ગયો હતો. અકસ્માત એટલો ભયાનક હતો કે વાહનમાં સવાર લોકોને સંભળવાનો મોકો પણ મળ્યો નહોતો અને ચીસાચીસ મચી ગઈ હતી.