વડોદરા શહેરમાં ખંડણી, જમીન હડપ કરવી, હત્યાનો પ્રયાસ અને ધાક-ધમકી જેવા અસંખ્ય સંગઠિત ગુનાઓ આચરીને આખી સિન્ડિકેટ ચલાવનારી કુખ્યાત બિચ્છૂ ગેંગના વડા અસલમ બોડિયાને કાયદાનો વધુ એક જોરદાર ફટકો પડ્યો છે. વડોદરા પોલીસ દ્વારા અસલમ બોડિયા અને તેની ગેંગના સાગરીતો સામે ગુજસીટોક (ગુજરાત કંટ્રોલ ઓફ ઓર્ગેનાઇઝ્ડ ક્રાઇમ) હેઠળ કડક કાર્યવાહી કરીને જેલના સળિયા પાછળ ધકેલી દેવામાં આવ્યો હતો. સુરક્ષાના કારણોસર અને વડોદરામાં બેઠા-બેઠા તેની ગેંગ ઓપરેટ ન થાય તે માટે તેને રાજકોટની મધ્યસ્થ જેલમાં ટ્રાન્સફર કરવામાં આવ્યો હતો.
જેલ બદલવા માટે તબિયતનું નાટક ખુલ્લું પડ્યું
લાંબા સમયથી રાજકોટ જેલમાં બંધ અસલમ બોડિયાએ વડોદરાની સ્પેશિયલ કોર્ટમાં એક વચગાળાની અરજી દાખલ કરીને માંગણી કરી હતી કે, તેની તબિયત સતત લથડી રહી છે અને તેને વિવિધ ગંભીર બીમારીઓ હોવાથી તેને વડોદરા મધ્યસ્થ જેલમાં શિફ્ટ કરવામાં આવે, જેથી અહીં તેનું સ્થાનિક સ્તરે અને પરિવારની દેખરેખ હેઠળ યોગ્ય તબીબી સારવાર થઈ શકે. જો કે, કાનૂની નિષ્ણાતો અને પોલીસ તંત્રના મતે, આ અરજી પાછળ અસલમ બોડિયાનો મુખ્ય હેતુ વડોદરા જેલમાં આવીને ફરીથી પોતાના સ્થાનિક સાગરીતો સાથે સંપર્ક સાધવાનો અને પોતાનું ગુનાહિત સામ્રાજ્ય સક્રિય કરવાનો હતો.
