વડોદરા શહેરમાં કાયદો અને વ્યવસ્થાની સ્થિતિને પડકાર ફેંકતી એક ગંભીર ઘટના હાથીખાના વિસ્તારમાં બની હતી, જ્યાં બે જૂથો વચ્ચેની અંગત અદાવત ઉગ્ર સ્વરૂપ ધારણ કરી ગઈ હતી. સામાન્ય બોલાચાલી અને જૂની અદાવતનું વેર વાળવા માટે સુફિયાન પઠાણ અને તેના સાગરીતોએ વિરોધી જૂથ પર નિશાન સાધીને એકપછી એક 4 રાઉન્ડ ધડાધડ ફાયરિંગ કરી દીધું હતું. આ ઘટનાને પગલે સમગ્ર વિસ્તારમાં નાસભાગ મચી ગઈ હતી અને સ્થાનિક બજારો ટપોટપ બંધ થઈ ગયા હતા.
રાજસ્થાનથી નેટવર્ક ઓપરેટ થતું હોવાનો ખુલાસો
ઘટનાની ગંભીરતા જોઈને વડોદરા શહેર પોલીસ કમિશનરના આદેશથી ક્રાઇમ બ્રાન્ચ અને સ્થાનિક પોલીસની ટીમો કામે લાગી હતી. પોલીસે ગણતરીના કલાકોમાં આક્રમક કોમ્બિંગ કરીને મુખ્ય આરોપી સુફિયાન પઠાણ સહિત ચાર શખ્સોને પકડી પાડ્યા હતા. તેમની અંગઝડતી લેતા ગુનામાં વપરાયેલી બે અદ્યતન પિસ્તોલ પણ મળી આવી હતી. આરોપીઓની કડક પૂછપરછ દરમિયાન ચોંકાવનારી કડીઓ હાથ લાગી છે. સુફિયાન પઠાણે કબૂલાત કરી છે કે તે આ હથિયારો ગુજરાત બહારથી એટલે કે રાજસ્થાનના ગેરકાયદેસર હથિયારના સોદાગરો પાસેથી લાવ્યો હતો.