બનાસકાંઠાના વાવ-થરાદ વિસ્તારમાં ચકચાર મચાવનારા પ્રવિણ ઠાકોર હત્યા કેસમાં થરાદ સેશન્સ કોર્ટે એક અત્યંત મહત્વપૂર્ણ ચુકાદો સંભળાવ્યો છે. કોર્ટે આ કેસના મુખ્ય આરોપી કમા ઉર્ફે કમલેશ ઝોઝુવાડિયાને દોષિત ઠેરવીને આજીવન કેદની સખત સજા ફટકારી છે. આ ઉપરાંત, અદાલતે આરોપીને રૂ. 1 લાખનો દંડ પણ ફટકાર્યો છે. કોર્ટના આ આકરા આદેશથી ગુનાહિત પ્રવૃત્તિઓ કરતા તત્વોમાં ફાળ પડી છે અને મૃતકના પરિવારને આખરે ન્યાય મળ્યો છે.
જુલાઈ 2024માં લાકડીના ફટકા મારી કરી હતી કરપીણ હત્યા
આ ચકચારી ઘટનાની વિગત મુજબ, જુલાઈ 2024માં સામાન્ય બાબતે થયેલી બોલાચાલી બાદ મામલો ઉગ્ર બન્યો હતો. આ દરમિયાન આરોપી કમા ઉર્ફે કમલેશ ઝોઝુવાડિયાએ આવેશમાં આવીને પ્રવિણ ઠાકોર પર લાકડીના સપાટા મારીને કરપીણ હુમલો કર્યો હતો. ગંભીર ઈજાઓના કારણે પ્રવિણ ઠાકોરનું મોત નીપજ્યું હતું. આ ઘટના બાદ થરાદ પોલીસ મથકે આરોપી કમા ઝોઝુવાડિયા સામે હત્યાનો ગુનો નોંધી કાયદેસરની કાર્યવાહી હાથ ધરવામાં આવી હતી.