Dwarka : જામ ખંભાળિયામાં ખરાબ રોડથી લોકો ત્રાહિમામ, વરસાદે ખોલી તંત્રની પોલ

ગુજરાતમાં વરસાદી માહોલ જામ્યો છે. દ્વારકા અને દીવ જેવા દરિયાકાંઠાના વિસ્તારોમાં છેલ્લા કેટલાક દિવસોમાં ધોધમાર વરસાદનું જોર રહ્યું. ભારે વરસાદને પગલે તંત્ર દ્વારા લોકોને નદી કાંઠા અને દરિયાકિનારે ના જવા સૂચના આપવામાં આવી હતી. દરમિયાન જામ ખંભાળિયામાં આજે વરસાદનું જોર ધીમું પડતા રોડ અને રસ્તામાં ખાડામાં જોવા મળ્યા. શહેરમાં ટ્રાફિકથી ધમધમતા અનેક રોડ બિસ્માર હાલતમાં જોવા મળ્યા. રસ્તામાં ખાડારાજના કારણે સ્થાનિકો પારવાર મુશ્કેલીનો સામનો કરી રહ્યા છે.

વાહનચાલકો અને રાહદારીઓ પરેશાન

જામખંભાળિયામાં વરસાદનું જોર ધીમું પડતા લોકોને હાશકારો થયો છે. પરંતુ પહેલા વરસાદમાં જ તંત્રની કામગીરીની પોલ ખુલી ગઈ છે. ચોમાસાના પહેલા વરસાદમાં જ અનેક વિસ્તારોમાં રોડમાં ખાડાઓ પડી ગયા. તો કેટલાક સ્થાનો પર પાણીના ધોવાણના કારણે રોડમાં કપચી અને કાંકરીઓ બહાર આવી ગઈ છે. જેના કારણે વાહનચાલકોને હેરાનગતિનો સામનો કરવો પડી રહ્યો છે. શહેરમાં ખખડધજ રોડથી વાહનચાલકો અને રાહદારીઓ પરેશાન થયા.

હવામાનની આગાહી

લોકોની ફરિયાદ છે કે રોડ પર આવા મસમોટા ખાડાથી અકસ્માતનો ભય છે. ખાડા પડેલ રોડમાં પસાર થવાથી વાહનચાલકોની પીઠની સમસ્યા વધી છે. એક વખત સત્તા પર બેસતા અધિકારીઓ આ રોડ પરથી પસાર થઈ જુએ પછી તેમને લોકોની મુશ્કેલી ધ્યાનમાં આવશે.અકસ્માતના જોખમને લઈને સ્થાનિકોએ માગ કરી છે કે તાત્કાલિક રોડ રિપેર કરવામાં આવે. જણાવી દઈએ કે વરસાદ અંગે હવામાન વિભાગએ આગાહી કરી છે કે આગામી 7 દિવસ હળવાથી મધ્યમ વરસાદ જોવા મળી શકે. દક્ષિણ અને ઉત્તર ગુજરાતમાં ભારે વરસાદની સંભાવનાને પગલે આગામી 5 દિવસ માછીમારો ને દરિયો ન ખેડવા સૂચના આપી છે.