ગુજરાત રોડ સેફ્ટી ઓથોરિટી અને વાહન વ્યવહાર વિભાગ ગુજરાતની પ્રેરણાથી આવાસ ફાઇનાન્સિયર્સ લિમિટેડ, રાજસ્થાન રોડ સેફ્ટી સોસાયટી અને સ્ટીલબર્ડના સંયુક્ત ઉપક્રમે તેમજ કડી સર્વ વિશ્વ વિદ્યાલય,ગાંધીનગરના સહયોગથી આવાસ યુથ રોડ સેફ્ટી શિક્ષણ અને જાગૃતિ અભિયાન અંતર્ગત માર્ગ સુરક્ષા અગ્રદૂત તાલીમ અને નિઃશુલ્ક હેલ્મેટ વિતરણ કાર્યક્રમનું આયોજન કરવામાં આવ્યું.કાર્યક્રમ દરમિયાન તાલીમ પૂર્ણ કર્યા બાદ 500 વિદ્યાર્થીઓએ માર્ગ સુરક્ષા અગ્રદૂત તરીકે દેશમાં સુરક્ષિત માર્ગ સંસ્કૃતિ વિકસાવવા અને વર્ષ 2047 સુધી માર્ગ અકસ્માતમુક્ત ભારતના નિર્માણમાં સક્રિય યોગદાન આપવાનો સંકલ્પ લીધો હતો.
અભિયાન અને તાલીમ મોડ્યુલની પ્રશંસા કરી
ગુજરાત રોડ સેફ્ટી ઓથોરિટીના કમિશનર સતીશ પટેલે સુરક્ષિત માર્ગો દ્વારા સમૃદ્ધ ભારતના નિર્માણ માટે અપીલ કરી અને માર્ગ સુરક્ષાના વિશેષ સંદેશ સાથે સ્ટીલબર્ડ હેલ્મેટ વિદ્યાર્થીઓને વિતરણ કર્યા હતાં. તેમણે આવાસ ફાઇનાન્સિયર્સ લિમિટેડ, રાજસ્થાન રોડ સેફ્ટી સોસાયટીની અધ્યક્ષ ઋતુ ચૌહાણ તથા તેમની ટીમ દ્વારા માર્ગ સુરક્ષા ક્ષેત્રે ચાલી રહેલા જનજાગૃતિ અભિયાનની પ્રશંસા કરી અને માર્ગ અકસ્માતો ઘટાડવા માટે સૌને સાથે મળીને કાર્ય કરવાની અપીલ કરી હતી.કડી સર્વ વિશ્વ વિદ્યાલય ડિરેક્ટર ગાર્ગી રાજપરાએ આ અનોખા અભિયાન અને તાલીમ મોડ્યુલની પ્રશંસા કરી હતી.
અકસ્માતગ્રસ્તોની મદદ માટે આગળ આવવાની અપીલ
મુખ્ય પ્રશિક્ષક તરીકે રાષ્ટ્રીય માર્ગ સુરક્ષા પુરસ્કારથી સન્માનિત માર્ગ સુરક્ષા વિષયના ગોલ્ડ મેડાલિસ્ટ અને રાજસ્થાનના ઉપ પરિવહન આયુક્ત ડૉ. વીરેન્દ્ર સિંહ રાઠોડે પોતાના દ્વારા તૈયાર કરાયેલા રોડ સેફ્ટી ચક્ર અને માર્ગ સુરક્ષા પોકેટ બુકના માધ્યમથી સરળ અને રસપ્રદ ઉદાહરણો દ્વારા સુરક્ષિત મુસાફરીના નિયમોની સમજ આપી હતી.તેમણે રાહવીર યોજના હેઠળ માર્ગ અકસ્માતમાં ઘાયલોની મદદ કરનારાઓને મળતા રોકડ ઇનામ અને પ્રશસ્તિપત્ર વિશે માહિતી આપી તેમજ વધુમાં વધુ લોકોને અકસ્માતગ્રસ્તોની મદદ માટે આગળ આવવાની અપીલ કરી હતી.
વિદ્યાર્થીઓને હંમેશા હેલ્મેટ પહેરવાની અપીલ
ડૉ.રાઠોડે જણાવ્યું કે,ભારત માર્ગ અકસ્માતોમાં થતા મૃત્યુના મામલે લાંબા સમયથી વિશ્વના અગ્રણી દેશોમાં સ્થાન ધરાવે છે. જે અત્યંત ચિંતાજનક બાબત છે. તેમણે વર્ષ 2047 સુધી અકસ્માતમુક્ત ભારતના લક્ષ્યને હાંસલ કરવા માટે યુવાનોને માર્ગ સુરક્ષા પ્રત્યે જાગૃત રહેવા આહ્વાન કર્યું હતું.ગુજરાત રોડ સેફ્ટી ઓથોરિટીના સંયુક્ત કમિશનર પ્રશાંત માંગુડાએ તમામ વિદ્યાર્થીઓને માર્ગ સુરક્ષાની શપથ લેવડાવી. તેમણે જણાવ્યું કે માર્ગ અકસ્માતોમાં થતા મૃત્યુના મામલે ગુજરાત દેશના ટોચના દસ રાજ્યોમાં સમાવિષ્ટ હોવું ગંભીર ચિંતાનો વિષય છે. તેમણે દ્વિચક્રી વાહન લઈને કોલેજ આવતા વિદ્યાર્થીઓને હંમેશા હેલ્મેટ પહેરવાની અપીલ કરી હતી.
1.15 લાખથી વધુ લોકોને તાલીમ અને હેલ્મેટ આપ્યા
આરટીઓ ગાંધીનગર કનકસિંહ પરમારે વિદ્યાર્થીઓને ડ્રાઇવિંગ લાઇસન્સનું મહત્વ, તેના નિયમો અને લાઇસન્સ મેળવવાની સંપૂર્ણ પ્રક્રિયા વિશે વિગતવાર માહિતી આપી હતી.આવાસ ફાઇનાન્સિયર્સ લિમિટેડના CSR હેડ સત્યજીત તિવારીએ હેલ્મેટના મહત્વ વિશે સમજાવતાં જણાવ્યું કે આ અભિયાન હેઠળ અત્યાર સુધી 35 હજારથી વધુ માર્ગ સુરક્ષા અગ્રદૂતો તૈયાર કરીને માર્ગ સુરક્ષાના વિશેષ સંદેશ સાથેના હેલ્મેટનું વિતરણ કરવામાં આવ્યું છે. રાજસ્થાન રોડ સેફ્ટી સોસાયટીના પ્રોજેક્ટ કોઓર્ડિનેટર ભરતરાજ ગુર્જરે જણાવ્યું કે સોસાયટીએ અત્યાર સુધી 1.15 લાખથી વધુ લોકોને તાલીમ અને હેલ્મેટ આપીને માર્ગ સુરક્ષા અગ્રદૂત બનાવ્યા છે, તેમજ 10 લાખથી વધુ લોકોને માર્ગ સુરક્ષા અંગે જાગૃત કર્યા છે.
આ પણ વાંચોઃ Ahmedabad News: AMC રોડ કમિટીએ સુભાષબ્રિજના કામને મંજૂરી આપી, કુલ ખર્ચમાં 7થી 10 કરોડનો ફાયદો થશે
