મેન્યુફેક્ચરિંગ, ઇન્ફ્રાસ્ટ્રક્ચર વિકાસ અને રોજગારી નિર્માણ પર ધ્યાન કેન્દ્રિત કરતા ગુજરાત સરકારે આજે સોમવારે વિવિધ પ્રોત્સાહક યોજનાઓ હેઠળ 2999 કરોડથી વધુના રોકાણ ધરાવતા ઔદ્યોગિક પ્રોજેક્ટ્સને મંજૂરી આપી છે.નાયબ મુખ્યમંત્રી અને ઉદ્યોગ મંત્રી હર્ષ સંઘવીની અધ્યક્ષતામાં યોજાયેલી ઉચ્ચસ્તરીય કમિટીઓની શ્રેણીબદ્ધ બેઠકો દરમિયાન આ પ્રોજેક્ટ્સને લીલી ઝંડી આપવામાં આવી હતી.
ઔદ્યોગિક નીતિ-2015 દ્વારા રોકાણ અને રોજગારીને વેગ
ગુજરાતને સામાજિક-આર્થિક વિકાસની દિવાદાંડી અને વિશ્વના સૌથી આકર્ષક રોકાણ સ્થાનોમાંથી એક બનાવવાના વિઝન સાથે ઔદ્યોગિક નીતિ 2015 હેઠળ ઇન્સેન્ટીવ ટુ ઇન્ડસ્ટ્રિઝ યોજના શરૂ કરવામાં આવી હતી.આ યોજના રાજ્યમાં સ્થાપિત થતા પાત્રતા ધરાવતા ઉદ્યોગોને નેટ એસ.જી.એસ.ટી. રિફંડ/સહાય આપે છે.આ નીતિએ અત્યાર સુધીમાં ગુજરાતભરમાં ₹ 148,336.35 કરોડના રોકાણને આકર્ષિત કર્યું છે અને 1,65,053 સીધી રોજગારીનું સર્જન કર્યું છે.આ રોકાણોએ સૂક્ષ્મ, લઘુ અને મધ્યમ ઉદ્યોગોના વિકાસને પણ ઝડપી બનાવ્યો છે.જેનાથી રાજ્યમાં ઉદ્યોગ-અનુકૂળ ઇકોસિસ્ટમ તૈયાર થઈ છે.
અંદાજે 4,739 સીધી રોજગારી ઊભી થવાની ધારણા
આ યોજનાનો મુખ્ય ઉદ્દેશ્ય મોટા પાયે રોકાણ આકર્ષીને અને નવા ઔદ્યોગિક પ્રોજેક્ટ્સને પ્રોત્સાહિત કરીને ગુજરાતને એડવાન્સ્ડ મેન્યુફેક્ચરિંગ, ટેક્નોલોજી અને ઇનોવેશન ક્ષેત્રે અગ્રેસર બનાવવાનો છે.નાયબ મુખ્યમંત્રી હર્ષ સંઘવીના અધ્યક્ષસ્થાને આજે 27 જુલાઈ, 2026ના રોજ મોટા ઉદ્યોગોને 'ફાઇનલ એલિજિબિલિટી સર્ટિફિકેટ' આપવા માટેની સમિતિની બેઠક મળી હતી.કમિટીએ રૂ 1,977.04 કરોડના કુલ મૂડીરોકાણ ધરાવતી 32 અરજીઓને મંજૂરી આપી હતી, જેનાથી અંદાજે 4,739 સીધી રોજગારી ઊભી થવાની ધારણા છે.
કેપિટલ સબસિડી યોજના હેઠળ રૂ 649.23 કરોડનો પ્રોજેક્ટ મંજૂર
મોટા ઉદ્યોગો અને થ્રસ્ટ સેક્ટર યોજના માટેની કેપિટલ સબસિડી હેઠળ અરજીઓ પર વિચારણા કરવા માટે પણ કમિટીની બેઠક યોજાઈ હતી.સમિતિએ રૂ 649.23 કરોડના રોકાણ ધરાવતા 1 પ્રોજેક્ટને મંજૂરી આપી છે, જેનાથી અંદાજે 871 સીધી રોજગારીનું સર્જન થશે. આ પ્રોજેક્ટ ગુજરાતની ઔદ્યોગિક ઇકોસિસ્ટમને વધુ મજબૂત કરશે અને સીધી તથા આડકતરી રોજગારીમાં વધારો કરશે.
કમિટીએ ૩ ટેક્સટાઈલ એકમો માટે સહાય મંજૂર કરી
કમિટીએ ૩ ટેક્સટાઈલ એકમો માટે સહાય મંજૂર કરી હતી જે કુલ મળીને રૂ 165 કરોડનું રોકાણ લાવશે અને અંદાજે 500 પ્રત્યક્ષ રોજગારીનું સર્જન કરશે.આ યોજના હેઠળ પાત્રતા ધરાવતા એકમોને વ્યાજ સહાય અને પાવર ટેરિફ સહાય મળે છે.સરકારે જણાવ્યું હતું કે આ ત્રણ એકમોને આગામી પાંચ વર્ષમાં રૂ 50 કરોડથી વધુની સહાય મળશે.ગુજરાત ઔદ્યોગિક નીતિ-2020 હેઠળ રાજ્ય સરકારે ઔદ્યોગિક પાર્ક સહાય યોજના અંતર્ગત 4 પ્રોજેક્ટ્સને મંજૂરી આપી છે. ઇન્ડસ્ટ્રિયલ પાર્કના વિકાસ માટે આ પ્રોજેક્ટ્સમાં કુલ ₹371.70 કરોડથી વધુનું રોકાણ થશે.જે ગુજરાતના ઔદ્યોગિક ઇન્ફ્રાસ્ટ્રક્ચરને વધુ મજબૂત કરશે.
આ પણ વાંચોઃ Gujarat Weather: રાજ્યમાં હાલ અતિભારે વરસાદનું સંકટ ટળ્યું, સમાન્યથી મધ્યમ વરસાદની આગાહી
