ગુજરાતમાં ચોમાસાની વિદાય બાદ રાજ્યના જળાશયોમાં પાણીના સંગ્રહની વર્તમાન સ્થિતિ ગંભીર ચિંતાનો વિષય બની રહી છે.રાજ્યમાં જળાશયોમાં વાસ્તવિક પાણીનો જથ્થો અપેક્ષા કરતા ઓછો જોવા મળી રહ્યો છે.જેના કારણે આગામી દિવસોમાં પીવાના અને સિંચાઈના પાણીને લઈને પ્રશ્નો ઊભા થઈ શકે છે.સરકારી આંકડાઓ મુજબ રાજ્યના મુખ્ય નર્મદા ડેમ સિવાયના અન્ય 206 જળાશયોમાં હાલ સરેરાશ માત્ર 63.49 ટકા જ પાણીનો જથ્થો ઉપલબ્ધ છે.સરદાર સરોવર નર્મદા ડેમ સહિત રાજ્યના કુલ 207 જળાશયોનો સંયુક્ત પાણીનો સંગ્રહ 77.09 ટકા જેટલો નોંધાયો છે જેના લીધે મોટી રાહત અનુભવાઈ રહી છે.
આટલા જળાશયોમાં જળસ્તર ઝડપથી ઘટી રહ્યું છે
કચ્છ અને સૌરાષ્ટ્રના વિસ્તારોમાં જળસંગ્રહની સ્થિતિ અત્યંત નબળી છે.કચ્છ જિલ્લામાં માત્ર 30.09 ટકા જ પાણીનો જથ્થો બચ્યો છે.જ્યારે સૌરાષ્ટ્ર ઝોનમાં પણ સ્થિતિ ચિંતાજનક છે જ્યાં માત્ર 46.29 ટકા જ પાણી ઉપલબ્ધ છે.આ બંને વિસ્તારોમાં પાણીનું સ્તર નીચું જવું આગામી ઉનાળાની સીઝન માટે સ્થાનિક પ્રશાસન અને નાગરિકો બંને માટે મોટો પડકાર સાબિત થઈ શકે છે.206 જળાશયોની વિગતવાર સમીક્ષા કરીએ તો તેમાંથી 127 જેટલા મોટા જળાશયો એવા છે જેમાં 50 ટકા કરતાં પણ ઓછું પાણી બચ્યું છે.આ અડધાથી ઓછું પાણી ધરાવતા 127 જળાશયોમાં સૌથી વધુ અસરગ્રસ્ત વિસ્તારોનો જ સમાવેશ થાય છે.જેમાં સૌરાષ્ટ્ર ઝોનનાં જ 101 જળાશયો અને કચ્છનાં 15 જળાશયો સામેલ છે.આ જળાશયોમાં જળસ્તર ઝડપથી ઘટી રહ્યું છે તે ખેતી અને પશુપાલન માટે ગંભીર સંકેત આપી રહ્યું છે.