ગાંધીનગરના ગિફ્ટ સિટી (Gift City) ખાતે આયોજિત આગામી એકતા પરેડ (Ekta Parade) ની તૈયારીઓ માટે દેશના વિવિધ વિસ્તારોમાંથી આવેલા સીમા સુરક્ષા બળ (BSF) ના જવાનો પર આરોગ્યનું મોટું સંકટ આવી પડ્યું છે. પરેડની કડક પ્રેક્ટિસ દરમિયાન BSF ના 14 જેટલા જવાનો ડેન્ગ્યુના ભરડામાં સપડાયા હોવાના સત્તાવાર રિપોર્ટ સામે આવ્યા છે. આ ઉપરાંત 70 થી વધુ જવાનોને સખત તાવ, શરદી અને શારીરિક અસ્વસ્થતાની ફરિયાદો ઊભી થતાં સુરક્ષા દળોના અધિકારીઓ અને સ્થાનિક તંત્રમાં ભારે દોડધામ મચી ગઈ છે.
સરકારી ક્વાર્ટર્સમાં હંગામી રહેણાંક અને રોગચાળાનું સંકટ
એકતા પરેડ માટે આવેલા BSF ના જવાનોની સગવડ માટે રાજ્ય સરકાર દ્વારા ગાંધીનગર ખાતેના સરકારી ક્વાર્ટર્સમાં હંગામી ધોરણે રહેવાની વિશેષ વ્યવસ્થા કરવામાં આવી હતી. જોકે, છેલ્લા કેટલાક દિવસોથી ક્વાર્ટર્સ અને આસપાસના વિસ્તારમાં મચ્છરોનો ઉપદ્રવ વધવાને કારણે જવાનોની તબિયત એકાએક લથડવા લાગી હતી. એકસાથે 70 થી વધુ જવાનો બીમાર પડતાં તમામના લોહીના નમૂના લઈ તબીબી પરીક્ષણ હાથ ધરવામાં આવ્યા હતા, જેમાંથી 14 જવાનોનો ડેન્ગ્યુ રિપોર્ટ પોઝિટિવ આવ્યો હતો.