ગુજરાત સરકારના મહેસૂલ વિભાગ દ્વારા રાજ્યના વહીવટી માળખામાં ચુસ્તતા અને પારદર્શિતા લાવવાના હેતુસર એક મહત્વપૂર્ણ અને મોટો નિર્ણય લેવામાં આવ્યો છે. વર્ગ-2 સંવર્ગના 39 મામલતદારોની સાગમટે બદલી કરવાના આદેશો આપવામાં આવ્યા છે. આ ઓર્ડર સાથે જ સચિવાલયથી લઈને તાલુકા કક્ષાની કચેરીઓમાં વહીવટી ગરમાવો આવી ગયો છે.
મહેસૂલ વિભાગ દ્વારા પ્રસિદ્ધ કરાયેલા નોટિફિકેશન અનુસાર, જે અધિકારીઓની બદલી કરવામાં આવી છે, તેઓને તેમના હાલના ફરજ પરના સ્થળેથી (કોલમ-2) તાત્કાલિક અસરથી છૂટા થઈને, સરકાર દ્વારા નક્કી કરવામાં આવેલા નવા નિમણૂક સ્થળે (કોલમ-4) હાજર થવા માટે કડક સૂચના આપવામાં આવી છે.
આ બદલીઓ પાછળનો મુખ્ય ઉદ્દેશ્ય રાજ્યની મહેસૂલી કામગીરીમાં વેગ લાવવાનો છે. ઘણીવાર લાંબા સમયથી એક જ જગ્યાએ ફરજ બજાવતા અધિકારીઓને કારણે વહીવટી પ્રક્રિયાઓમાં જડતા આવી જતી હોય છે અથવા સ્થાપિત હિતો ઊભા થવાની ભીતિ રહેતી હોય છે. રાજ્ય સરકારના આ નિર્ણયને પગલે હવે તાલુકા કક્ષાએ જમીન માપણી, દસ્તાવેજીકરણ અને જનસેવા કેન્દ્રોની કામગીરીમાં નવી ઊર્જાનો સંચાર થશે તેવી આશા છે.
સૂત્રોના જણાવ્યા અનુસાર, રાજ્ય સરકાર આગામી સમયમાં પ્રજાલક્ષી કામોમાં કોઈ પણ પ્રકારની ઢીલાશ ચલાવી લેવા માંગતી નથી. બદલી પામેલા અધિકારીઓની યાદી મહેસૂલ વિભાગની સત્તાવાર વેબસાઈટ પર ઉપલબ્ધ કરાવવામાં આવી છે, જેથી વહીવટી પ્રક્રિયામાં પારદર્શિતા જળવાઈ રહે. આ આદેશોનું પાલન તાત્કાલિક અસરથી કરવાનું હોવાથી, રાજ્યભરની વિવિધ મામલતદાર કચેરીઓમાં ચાર્જ સોંપવાની અને સંભાળવાની પ્રક્રિયા યુદ્ધના ધોરણે શરૂ કરી દેવામાં આવી છે.
આ પણ વાંચો - Gandhinagar News: CCEના ઉમેદવારોની આતુરતાનો અંત, આ તારીખે મુખ્યમંત્રીના હસ્તે અપાશે નિમણૂક પત્ર
