ગાંધીનગરના સત્યાગ્રહ છાવણી ખાતે આજે શિક્ષકો દ્વારા એક મોટું વિરોધ પ્રદર્શન યોજવામાં આવ્યું હતું. રાજ્ય સરકાર દ્વારા વર્ષ 2010 પહેલાં સેવામાં જોડાયેલા જૂના અને અનુભવી શિક્ષકો માટે પણ TET પરીક્ષા ફરજિયાત કરવાના નિર્ણય સામે શિક્ષક આલમમાં ભારે રોષ ફાટી નીકળ્યો છે. આ વિવાદાસ્પદ નિયમનો વિરોધ કરવા માટે રાજ્યભરમાંથી ખૂબ જ મોટી સંખ્યામાં શિક્ષકો ગાંધીનગર ખાતે એકઠા થયા હતા અને સરકાર સામે સૂત્રોચ્ચાર કરીને પોતાનો ઉગ્ર વિરોધ નોંધાવ્યો હતો.
અનુભવી શિક્ષકો પર ગેરવ્યાજબી નિયમ થોપવાનો પ્રયાસ
આંદોલન કરી રહેલા શિક્ષકોનું કહેવું છે કે, જેઓ વર્ષ 2010 પહેલાથી એટલે કે છેલ્લા 15-20 વર્ષ કરતાં વધુ સમયથી શાળામાં સફળતાપૂર્વક શિક્ષણ આપી રહ્યા છે, તેમની પાસે બહોળો અનુભવ છે. આવા અનુભવી શિક્ષકો પાસે હવે આ ઉંમરે TET ની પરીક્ષા પાસ કરવાનો નિયમ રાખવો તે તદ્દન ગેરવ્યાજબી અને અન્યાયકર્તા છે. વિરોધ પ્રદર્શનમાં હાજર એક શિક્ષકે મીડિયા સાથે વાતચીતમાં આક્રોશ વ્યક્ત કરતા જણાવ્યું હતું કે, "આ સરકાર દ્વારા જૂના શિક્ષકોને હેરાન કરવા અને નવી પરીક્ષાઓ લાવીને માત્ર 'તૂત' ઊભું કરવાનો પ્રયાસ થઈ રહ્યો છે. આ નિયમ કોઈ પણ કાળે સ્વીકાર્ય નથી."