ગાંધીનગર મહાનગરપાલિકા (GMC) ની ચૂંટણી નજીક આવતાં જ રાજકીય ગરમાવો વધી ગયો છે. આજથી ભારતીય જનતા પાર્ટીએ ગાંધીનગરના તમામ 11 વોર્ડમાં પોતાના મધ્યસ્થ ચૂંટણી કાર્યાલયો વિધિવત રીતે શરૂ કરીને પ્રચારના શ્રીગણેશ કરી દીધા છે. વોર્ડ નંબર 1 માં આયોજિત કાર્યાલયના શુભારંભ પ્રસંગે ગાંધીનગર મનપાના ચૂંટણી પ્રભારી અને કેબિનેટ મંત્રી ઋષિકેશ પટેલ ખાસ ઉપસ્થિત રહ્યા હતા.

ગાંધીનગર મનપા ચૂંટણીનો જંગ જામ્યો

માધ્યમો સાથેની વાતચીતમાં ચૂંટણી પ્રભારી ઋષિકેશ પટેલે જણાવ્યું હતું કે, "મધ્યસ્થ કાર્યાલય એ ચૂંટણી પ્રચાર અને આયોજન માટેની એક વ્યવસ્થિત સિસ્ટમ છે. મનપા અને ભાજપ સરકારે ગાંધીનગરમાં કરેલા અભૂતપૂર્વ વિકાસના કામોને લઈને અમે જનતા વચ્ચે જઈશું અને તે કામોના આધારે જ લોકો પાસે મત માંગીશું." આજથી જ તમામ 11 વોર્ડમાં ભાજપનો સ્થાનિક પ્રચાર પૂરજોશમાં શરૂ થઈ ગયો છે.

ભાજપે તમામ 11 વોર્ડમાં મધ્યસ્થ કાર્યાલય કર્યા શરૂ

પૂર્વ મુખ્યમંત્રી શંકરસિંહ વાઘેલા (બાપુ) અંગે પૂછાયેલા પ્રશ્નના જવાબમાં મંત્રી ઋષિકેશ પટેલે કટાક્ષ કરતા કહ્યું હતું કે, "બાપુ અને કોંગ્રેસ બંનેને મારી શુભેચ્છાઓ છે. પણ કોંગ્રેસે બાપુનું ધ્યાન રાખવું જોઈએ, તેમને યોગ્ય માન-સન્માન આપવું જોઈએ અને ફરીથી ધક્કો ન મારે તેની ચિંતા કોંગ્રેસે પણ કરવી જોઈએ. સાથે જ બાપુ પણ આ બાબતે ચેતીને અને જાગૃત રહે તેવી મારી શુભેચ્છા છે."

આ પણ વાંચો: Dahod: ઝાલોદમાં તળાવમાં ડૂબી જતાં બે સગી બહેનોના મોત, અકસ્માતે પગ લપસી જતાં બની ઘટના