ગુજરાત સરકારે રાજ્યની સરકારી તથા ગ્રાન્ટ-ઇન-એઇડ (અનુદાનિત) ઔદ્યોગિક તાલીમ સંસ્થાઓ (ITIs)માં તાલીમાર્થીઓને વ્યવસાયલક્ષી અને કૌશલ્યલક્ષી તાલીમ આપવામાં મહક્ત્ત્વપૂર્ણ યોગદાન આપતા પ્રવાસી સુપરવાઇઝર ઇન્સ્ટ્રક્ટરોના હિતમાં નિર્ણય લીધો છે.શ્રમ, કૌશલ્ય વિકાસ અને રોજગાર વિભાગ દ્વારા આ ઇન્સ્ટ્રક્ટરોના માનદ વેતનના દરોમાં નોંધપાત્ર વધારો કરવાનો ઠરાવ કરવામાં આવ્યો છે.આ નિર્ણયથી તાલીમ ક્ષેત્રે કાર્યરત પ્રવાસી સુપરવાઇઝર ઇન્સ્ટ્રક્ટરોને આર્થિક લાભ મળવાની સાથે તેમની સેવાઓને વધુ પ્રોત્સાહન મળશે.
માસિક મહત્તમ માનદ વેતનની મર્યાદામાં પણ બમણો વધારો
આ નિર્ણય અનુસાર પ્રવાસી સુપરવાઇઝર ઇન્સ્ટ્રક્ટરોના પ્રતિ કલાક માનદ વેતનના દરમાં રૂ.90થી વધારો કરીને રૂ.180 કરવામાં આવ્યો છે.દૈનિક મહત્તમ માનદ વેતનની મર્યાદા રૂ. 540 થી વધારીને રૂ.1080 કરવામાં આવી છે.જ્યારે માસિક મહત્તમ માનદ વેતનની મર્યાદામાં પણ બમણો વધારો કરીને રૂ.14040 થી વધારીને રૂ.28,080 કરવામાં આવી છે. દૈનિક મહત્તમ તથા માસિક મહત્તમ માનદ વેતનની મર્યાદામાં બમણાથી વધુનો વધારો કરવામાં આવતાં પ્રવાસી સુપરવાઇઝર ઇન્સ્ટ્રક્ટરોને તેમની સેવાઓના પ્રમાણમાં વધુ આર્થિક લાભ મળી શકશે. આ સાથે જ; આઈટીઆઈમાં ભણતા વિદ્યાર્થીઓને પણ વધુ શ્રેષ્ઠ ઇન્સ્ટ્રક્ટર્સ દ્વારા ઉચ્ચ કક્ષાની અને અવિરત તાલીમ મળશે.માનદ વેતનમાં વધારો થતાં વધુ સંખ્યામાં વિઝિટર્સ ઇન્સ્ટ્રક્ટર્સ સેવાઓ આપવા માટે તૈયાર થશે કે જેથી વિદ્યાર્થીઓનો અભ્યાસ પણ નહીં બગડે.