ગુજરાત સરકારની કેબિનેટ બેઠકમાં અનેક મહત્વપૂર્ણ નિર્ણયો લેવામાં આવ્યા છે.મુખ્યમંત્રીની અધ્યક્ષતામાં મળેલી આ બેઠકમાં રાજ્યમાં ભારે વરસાદને કારણે સર્જાયેલી પૂરની સ્થિતિ અને તેનાથી થયેલા નુકસાનની સમીક્ષા કરવામાં આવી હતી.સરકાર દ્વારા પૂરગ્રસ્તોને તાત્કાલિક સહાય આપવાની જાહેરાત કરવામાં આવી છે. જેના માટે નુકસાનીનો સર્વે વહેલી તકે પૂર્ણ કરવાનો આદેશ અપાયો છે.અમદાવાદમાં પણ ભારે વરસાદથી વ્યાપક નુકસાન થયું હોવાથી સુરત મોડેલની તર્જ પર અમદાવાદના વેપારીઓને પણ આર્થિક સહાય પૂરી પાડવામાં આવશે.
1997 અસરગ્રસ્ત ગામોમાં વીજળી પૂર્વવત
વરસાદી હોનારત વચ્ચે વીજ પુરવઠો પુનઃસ્થાપિત કરવા અંગે તેમણે માહિતી આપતાં જણાવાયું હતું કે,રાજ્યના અત્યાર સુધીના 1997 અસરગ્રસ્ત ગામોમાં વીજળી સફળતાપૂર્વક પૂર્વવત કરી દેવામાં આવી છે.આ કામગીરી દરમિયાન વીજ કર્મચારીઓના જીવનું જોખમ વધતું હોવાનું ધ્યાને આવતાં મુખ્યમંત્રીએ ચીફ સેક્રેટરીને સ્પષ્ટ સૂચના આપી છે કે તમામ વીજ કર્મચારીઓને તાત્કાલિક ધોરણે જરૂરી સેફ્ટી સાધનો પૂરા પાડવામાં આવે.આ ઉપરાંત વરસાદમાં વારંવાર તૂટી જતા રસ્તાઓની સમસ્યાનું કાયમી નિરાકરણ લાવવા માટે તમામ મહાનગરપાલિકા અને નગરપાલિકાઓમાં સિમેન્ટ-કોંક્રિટ રોડ બનાવવાનો મોટો નિર્ણય લેવાયો છે.