ગુજરાત વિધાનસભાના ચોમાસુ સત્રનો આજે અંતિમ દિવસ છે.આજના દિવસની સરકારી કામગીરી અંતર્ગત ગૃહમાં ત્રણ મહત્વપૂર્ણ સરકારી વિધેયકો રજૂ કરવામાં આવશે. જેમાં વેપાર અને ઉદ્યોગ સાહસિકતાને વધુ સુગમ બનાવવા માટે ગુજરાત ઇઝ ઓફ ડુઈંગ બિઝનેસ વિધેયક,ભાડા કરાર અને મકાનમાલિક-ભાડૂતના નિયમોમાં સુધારા માટે ગુજરાત ભાડા વિધેયક અને ખેતીની જમીનના ટુકડા પડતા અટકાવવા તથા તેના એકત્રીકરણ માટેનું સુધારા વિધેયક સામેલ છે.આજે પ્રશ્નોત્તરીકાળ સાથે ગૃહની કામગીરી શરૂ થઈ છે.
ગુજરાત વિધાનસભાના 3 દિવસીય ચોમાસુ સત્રનું સમાપન, 7 મહત્વના બિલ પસાર
ગુજરાત વિધાનસભાનું 3 દિવસીય ટૂંકું ચોમાસુ સત્ર આજે પૂર્ણ થયું છે, જેમાં વિકાસ, ઉદ્યોગ અને મહેસૂલને લગતા 7 મહત્વના વિધેયકો પસાર કરાયા છે અને 486 જેટલા તારાંકિત પ્રશ્નોના જવાબો આપવામાં આવ્યા છે.
ગૃહમાં પસાર થયેલા મહત્વના 7 વિધેયકો
- ઇઝ ઓફ ડુઈંગ બિઝનેસ વિધેયક - બહુમતીથી
- પશુધન આહાર વિધેયક - સર્વાનુમતે
- માધ્યમિક અને ઉચ્ચતર માધ્યમિક શિક્ષણ સુધારા વિધેયક - બહુમતીથી
- જમીન મહેસૂલ સુધારા વિધેયક - સર્વાનુમતે
- ગુજરાત ભાડા (ભાડુઆત) વિધેયક - સર્વાનુમતે
- GST સુધારા વિધેયક - સર્વાનુમતે
- જમીન ટુકડા અને એકત્રીકરણ સુધારા વિધેયક - સર્વાનુમતે
નિયમ 116 હેઠળ દુષ્કાળની સ્થિતિ અંગે ચર્ચા
રાજ્યમાં અનાવૃષ્ટિ અને પાક નિષ્ફળ જવાના મુદ્દે કોંગ્રેસ દ્વારા નિયમ 116 અંતર્ગત ચર્ચા ઉઠાવવામાં આવી હતી. વિપક્ષે અસરગ્રસ્ત વિસ્તારોમાં સત્તાવાર દુષ્કાળ જાહેર કરવાની અને ખેડૂતોને તાત્કાલિક સિંચાઈનું પાણી તેમજ ઘાસચારો પૂરો પાડવાની માંગ કરી હતી. તેના જવાબમાં સરકારે ખેડૂતોના હિતમાં અત્યાર સુધી લેવાયેલા રાહત પગલાંની વિસ્તૃત માહિતી ગૃહમાં રજૂ કરી હતી.
વંદે માતરમ વિવાદ: વિશેષાધિકાર સમિતિને સોંપાયો મામલો
સમગ્ર ટૂંકા સત્ર દરમિયાન કોંગ્રેસના ધારાસભ્ય ઈમરાન ખેડાવાલાનો 'વંદે માતરમ' ગાન વખતનો વિવાદ સૌથી વધુ ચર્ચાના કેન્દ્રમાં રહ્યો. સત્રના પ્રથમ દિવસે રાષ્ટ્રગાન ચાલુ હતું ત્યારે ખેડાવાલા બેસી જતાં ભારે વિવાદ સર્જાયો હતો. નાયબ મુખ્યમંત્રીએ પોઇન્ટ ઓફ ઓર્ડર ઉઠાવીને વિશેષાધિકાર ભંગની માંગ કરી હતી. વિધાનસભા અધ્યક્ષે આ ઘટનાને રાષ્ટ્રગીત અને ગૃહની ગરિમાના અપમાન સમાન ગણી અતિ ગંભીર ગણાવી હતી અને વિસ્તૃત ચર્ચા બાદ સમગ્ર મામલો વિશેષાધિકાર સમિતિને સોંપી દીધો છે. હવે આ સમિતિ ઊંડાણપૂર્વક તપાસ કરીને પોતાનો અંતિમ અહેવાલ ગૃહમાં રજૂ કરશે.
'ઇઝ ઓફ ડુઈંગ બિઝનેસ' વિધેયક હેઠળ હવે 24 કલાક દુકાનો અને સંસ્થાઓ ખુલ્લી રાખી શકાશે
ગુજરાત વિધાનસભામાં પસાર કરાયેલા 'ઇઝ ઓફ ડુઈંગ બિઝનેસ વિધેયક' અંતર્ગત રાજ્યમાં વેપાર-રોજગારને વેગ આપવા માટે મહત્વપૂર્ણ સુધારો કરવામાં આવ્યો છે. 'ગુજરાત શોપ્સ એન્ડ એસ્ટાબ્લિશમેન્ટ એક્ટ' માં સુધારો કરીને હવે રાજ્યમાં દુકાનો અને વ્યાપારી સંસ્થાઓને 24 કલાક ખુલ્લી રાખવાની સુવિધા આપવામાં આવશે. આ નવા નિયમ અંતર્ગત નિયમિત કામના કલાકો, મહિલા કર્મચારીઓની સુરક્ષા, આરામના અંતરાલ અને રોજગારીની નિર્ધારિત શરતોનું પાલન કરવાનું રહેશે. આ ઉપરાંત, રજિસ્ટ્રેશન અને મંજૂરી પ્રક્રિયાને સરળ બનાવવા માટે સેલ્ફ ડેકલેરેશન (સ્વ-ઘોષણા) અને સ્વ-પ્રમાણીકરણની સુવિધા ઉપલબ્ધ કરાવાઈ છે. રાજ્યપાલશ્રીની મંજૂરી મળ્યા બાદ આ વિધેયક કાયદાનું રૂપ ધારણ કરશે.
વિધાનસભામાં 'જમીન ટુકડા અને એકત્રીકરણ સુધારા બિલ' સર્વાનુમતે પસાર
ગુજરાત વિધાનસભા ગૃહમાં મહેસૂલ વિભાગને લગતું મહત્વપૂર્ણ 'જમીન ટુકડા અને એકત્રીકરણ સુધારા બિલ' સર્વાનુમતે પસાર કરવામાં આવ્યું છે. અગાઉ સરકાર દ્વારા વટહુકમ બહાર પાડીને આ કાયદાની જોગવાઈઓમાં સુધારો કરવામાં આવ્યો હતો, જેને હવે વિધેયકના રૂપમાં ગૃહની મંજૂરી મળી ગઈ છે. આ બિલ મારફતે કાયદાની કલમ 5 અને 9 માં સુધારો કરવામાં આવશે, જેનાથી વર્ષ 1948 થી લઈને અત્યાર સુધીના જમીન ટુકડા ધારા હેઠળના તમામ કેસો કોઈ પણ જાતની દંડકીય પેનલ્ટી ભર્યા વિના નિયમિત કરી શકાશે.
આ સુધારા વિધેયકથી ખેડૂતો અને જમીનમાલિકોને મોટો લાભ થશે, કારણ કે જમીન બિનખેતી (NA) કરાવવા માટે સમગ્ર રાજ્યમાં 10 ગુંઠાનો એકસમાન નિયમ અમલી બનાવવામાં આવશે. આ ઉપરાંત, ઝડપી શહેરીકરણને ધ્યાનમાં રાખીને શહેરી વિસ્તારોને ટુકડા ધારાની જટિલ જોગવાઈઓમાંથી મુક્તિ આપવામાં આવી છે, જેનાથી કાનૂની ગૂંચવણો દૂર થશે અને મિલકત ટ્રાન્સફર સંબંધિત પ્રક્રિયા વધુ સરળ બનશે.
વિધાનસભામાં કોંગ્રેસ નેતા શૈલેષ પરમારે સંભાળ્યું ગૃહનું સંચાલન, અધ્યક્ષની ગેરહાજરીમાં સ્પીકર પેનલના સભ્ય તરીકે કાર્યવાહી ચલાવી
ગુજરાત વિધાનસભા ગૃહમાં એક વિશિષ્ટ દ્રશ્ય જોવા મળ્યું હતું, જ્યાં અધ્યક્ષની ગેરહાજરીમાં વિપક્ષ કોંગ્રેસના સિનિયર નેતા અને ધારાસભ્ય શૈલેષ પરમાર અધ્યક્ષની ચેર પર બેસીને ગૃહની કાર્યવાહીનું સંચાલન કરતા નજરે પડ્યા હતા. નિયમાનુસાર વિધાનસભાના અધ્યક્ષ અને ઉપાધ્યક્ષ બંનેની ગેરહાજરી હોય ત્યારે ગૃહનું કામકાજ સુચારૂ રીતે ચલાવવા માટે સ્પીકર પેનલમાંથી સભ્યોની પસંદગી કરવામાં આવતી હોય છે. શૈલેષ પરમારનો વિધાનસભાની સ્પીકર પેનલમાં સમાવેશ કરાયેલો હોવાથી, તેમણે અધ્યક્ષસ્થાને બિરાજીને પીઠાસીન અધિકારી તરીકે ગૃહની તમામ વહીવટી અને ચર્ચાસ્પદ કાર્યવાહી કુશળતાપૂર્વક સંભાળી હતી.
ભાડૂઆતો અને મકાન માલિકો માટે મોટો ફેરફાર, હવે 3 મહિનાથી વધુ સિક્યોરિટી ડિપોઝિટ નહીં
ગુજરાત વિધાનસભામાં ‘ગુજરાત ભાડા વિધેયક-2026’ વિના વિરોધે સર્વાનુમતે પસાર કરવામાં આવ્યું છે. શહેરી વિકાસ મંત્રી કનુભાઈ દેસાઈએ વિધેયક રજૂ કરતાં જણાવ્યું કે રાજ્યમાં અત્યાર સુધી લાગુ મુંબઈ ભાડા અને નિવાસ ગૃહદર નિયંત્રણ અધિનિયમ, 1947ની જગ્યાએ વર્તમાન જરૂરિયાતોને અનુરૂપ નવો કાયદો લાવવામાં આવ્યો છે.
વંદે માતરમ ગાનના અપમાન મુદ્દે ગંભીર વિવાદ, MLA ઈમરાન ખેડાવાલા સામેનો કેસ વિધાનસભાની વિશેષાધિકાર સમિતિને સોંપાયો
ગુજરાત વિધાનસભા ગૃહમાં રાષ્ટ્રગીત/રાષ્ટ્રગાન 'વંદે માતરમ' ના અનાદર મુદ્દે વિધાનસભા અધ્યક્ષ શંકર ચૌધરીએ મોટો નિર્ણય જાહેર કર્યો છે. ગૃહમાં 'વંદે માતરમ' ગાન દરમિયાન કોંગ્રેસના ધારાસભ્ય ઈમરાન ખેડાવાલા બેસી જતાં નાયબ મુખ્યમંત્રી હર્ષ સંઘવીએ વિશેષાધિકાર ભંગનો મુદ્દો ઉઠાવ્યો હતો. અધ્યક્ષે વિડીયો ફૂટેજની તપાસ બાદ જણાવ્યું હતું કે, ખેડાવાલા શરૂઆતમાં ઊભા થયા બાદ બેસી ગયા હતા, જે ગાનનો વિરોધ અને બંધારણીય શપથનું ઉલ્લંઘન દર્શાવે છે.
અધ્યક્ષે આ ઘટનાને અત્યંત ગંભીર ગણાવતાં નોંધ્યું હતું કે, ધારાસભ્ય તરીકે તેમની પાસે નિયમોના પાલનની વધુ અપેક્ષા હોય છે. ભારત સરકારના 28 જાન્યુઆરી 2026 ના આદેશ અને નિયમોનું ઉલ્લંઘન કરીને તેમણે ગૃહની અવમાનના કરી છે. પોઈન્ટ ઓફ ઓર્ડર વખતે પણ ગેરહાજર રહેલા ખેડાવાલાએ ગૃહને ખુલાસો આપવાને બદલે મીડિયામાં બાઈટ આપી અધ્યક્ષના આદેશનું અનાદર કર્યું હતું. આ મામલે કડક કાર્યવાહી કરતાં અધ્યક્ષે વંદે માતરમના અપમાનનો આ કેસ વિધાનસભાની 'વિશેષાધિકાર સમિતિ'ને સોંપવાની જાહેરાત કરી છે. નોંધનીય છે કે, અંદાજે 13 વર્ષ બાદ (છેલ્લે 2012 પછી) વિશેષાધિકાર ભંગનો મુદ્દો સમિતિને સોંપાયો છે.
ગુજરાતમાં 'ભાડુઆત વિધેયક' વિધાનસભા ગૃહમાં સર્વાનુમતે પસાર, કોંગ્રેસ અને આપના સભ્યોએ પણ આપ્યું બીલને સમર્થન
ગુજરાત વિધાનસભા ગૃહમાં રજૂ કરવામાં આવેલું 'ભાડુઆત વિધેયક' સર્વાનુમતે પસાર થઈ ગયું છે. મકાનમાલિકો અને ભાડૂઆતોના હિતોના રક્ષણ તેમજ મિલકત સંબંધિત વિવાદોના ઝડપી નિરાકરણ માટે લાવવામાં આવેલા આ મહત્વપૂર્ણ બીલને શાસક પક્ષ સાથે વિપક્ષ કોંગ્રેસ અને આમ આદમી પાર્ટીના સભ્યોએ પણ પૂર્ણ સમર્થન આપ્યું હતું. તમામ પક્ષોના વિધાયકોના વ્યાપક ટેકા બાદ આ વિધેયક ગૃહમાં બિનહરીફ રીતે પસાર કરવામાં આવ્યું છે.
ગુજરાત ઇઝ ઓફ ડુઈંગ બિઝનેસ વિધેયક ગૃહમાં પસાર
ગુજરાત વિધાનસભામા આજે ઇઝ ઓફ ડુઈંગ બિઝનેસ 2026 વિધેયક રજૂ કરવામાં આવ્યું હતું. આ વિધેયક પસાર કરતી વેળાએ થયેલી ચર્ચામાં શાસક અને વિપક્ષ વચ્ચે તકમક ઝરી હતી. પરંતુ આખરે બહુમતીથી આ બિલ ગૃહમાં પસાર થયું હતું.
ગુજરાત સરકારના જાહેર દેવામાં સતત વધારો
ગુજરાત સરકારના જાહેર દેવામાં સતત વધારો થઈ રહ્યો છે, જે અંગે વિધાનસભા ગૃહમાં રજૂ કરાયેલા આંકડાઓએ ચર્ચા જગાવી છે. પ્રાપ્ત માહિતી અનુસાર, નાણાકીય વર્ષ ૨૦૨૪-૨૫ દરમિયાન રાજ્યનું કુલ જાહેર દેવું ₹૩,૯૪,૬૮૪ કરોડ હતું, જે વધીને નાણાકીય વર્ષ ૨૦૨૫-૨૬માં ₹૪,૩૦,૩૨૦ કરોડ પર પહોંચી ગયું છે. આમ, માત્ર એક જ વર્ષના સમયગાળામાં રાજ્યના જાહેર દેવામાં આશરે ₹૩૫,૬૩૬ કરોડનો તોતિંગ વધારો નોંધાયો છે, જેના કારણે સરકારની નાણાકીય સ્થિતિ અને દેવાંના પ્રબંધન સામે ગંભીર સવાલો ઉઠી રહ્યા છે.
ખેડૂતો સદ્ધર હોવાનું રટણ કરાય છે
ગોપાલ ઈટાલિયાએ ગૃહમાં પૂર્વ મુખ્યમંત્રી સ્વ.વિજય રૂપાણીના સમયને યાદ કરતા જણાવવામાં આવ્યું હતું કે તે સમયે કોઈ જ જટિલ પેરામીટરોમાં ફાફા માર્યા વિના ખેડૂતોને પાક નુકસાનની સહાય સરળતાથી મળી રહે તે માટે સ્પષ્ટ પરિપત્ર બહાર પાડવામાં આવ્યો હતો. જેમાં જો ચાલુ સિઝનમાં 10 ઇંચથી ઓછો વરસાદ પડ્યો હોય અથવા 31 ઓગસ્ટ સુધી સતત 4 અઠવાડિયા સુધી વરસાદ ન પડ્યો હોય તો તેને સીધો જ દુષ્કાળ ગણી લેવામાં આવતો હતો. આજે સરકાર વૈજ્ઞાનિક પેરામીટરોની વાત કરીને ખેડૂતોને રાહત આપવામાં વિલંબ કરી રહી છે, જ્યારે વાસ્તવિકતા એ છે કે અનેક પરિવારો પોતાના મૂંગા પશુઓ સાથે હિજરત કરવા મજબૂર બન્યા છે અને સરકાર જ્યાં સુધી પેરામીટર માપશે ત્યાં સુધીમાં તો કદાચ ખેડૂત આત્મહત્યા કરવા મજબૂર બની જશે. સરકાર દ્વારા માત્ર ભગવાનને પ્રાર્થના કરવાનું કહેવામાં આવે છે અને ખેડૂતો સદ્ધર હોવાનું રટણ કરાય છે.
પાકના મૂળિયા પહેલેથી જ નિષ્ફળતા તરફ વળી ગયા
ધારાસભ્ય ગોપાલ ઈટાલિયાએ કહ્યું હતું કે, આજે વિધાનસભાના સત્રના અંતિમ દિવસે દુષ્કાળની સ્થિતિ અને ખેડૂતોની હાલાકી અંગે ગરમાગરમ ચર્ચા થઈ હતી જેમાં સરકાર દ્વારા વરસાદના મિમી, આબોહવા અને દુષ્કાળ જાહેર કરવાના વિવિધ વૈજ્ઞાનિક પેરામીટરોની વાત કરવામાં આવી હતી.તેના પર આકરા પ્રહાર કરતા જણાવવામાં આવ્યું હતું કે સરકાર પાસે દુષ્કાળ માપવાના પેરામીટર છે પરંતુ ખેડૂતોનું દુઃખ અને વેદના માપવાનું કોઈ પેરામીટર નથી.હાલ જમીનમાં પાણી સુકાઈ રહ્યું છે અને હવે જો વરસાદ આવે તો પણ પાકને કોઈ ફાયદો થઈ શકે તેમ નથી કારણ કે પાકના મૂળિયા પહેલેથી જ નિષ્ફળતા તરફ વળી ગયા છે.
ઇલેક્ટ્રિસિટી ડ્યુટી પેટે સરકારને કરોડોની આવક
વિધાનસભા ગૃહમાં રજૂ કરવામાં આવેલા સરકારના લેખિત જવાબ અનુસાર, રાજ્ય સરકારને વર્ષ ૨૦૨૫-૨૬ દરમિયાન ઇલેક્ટ્રિસિટી ડ્યુટી પેટે ૧૨,૪૯૪ કરોડ રૂપિયાની જંગી આવક પ્રાપ્ત થઈ છે, જ્યારે આ જ સમયગાળા દરમિયાન વેટ (VAT) ની આવક પેટે સરકારને ૨૪,૭૮૫ કરોડ રૂપિયા જેટલી માતબર રકમ મળી હોવાની સત્તાવાર માહિતી સામે આવી છે.
ગાંધીનગર મહાનગરપાલિકાની ચૂંટણીને લઈને રાજકીય ગરમાવો
ગાંધીનગર મહાનગરપાલિકાની આગામી ચૂંટણીને લઈને રાજકીય ગરમાવો શરૂ થઈ ગયો છે, કારણ કે ભૂતકાળમાં ગાંધીનગર મનપાની ચૂંટણીમાં આમ આદમી પાર્ટીએ પહેલીવાર ઝંપલાવ્યું ત્યારે જનતાએ આશીર્વાદ આપીને ૨૨ ટકા જેટલા મતો સાથે ઐતિહાસિક શરૂઆત કરી હતી અને ૧ બેઠક જીતીને ગુજરાતમાં આપની સફરનો મજબૂત પાયો નાખ્યો હતો. ગત ચૂંટણીમાં કોંગ્રેસમાંથી ચૂંટાયેલા ૩ કોર્પોરેટરો બાદમાં ભાજપમાં જોડાઈ ગયા હતા, જેને ધ્યાનમાં રાખીને આ વખતે 'આપ' દ્વારા એકલા હાથે જ મેદાનમાં ઉતરીને ચૂંટણી લડવાની રણનીતિ બનાવવામાં આવી રહી છે. ગાંધીનગરમાં ગ્રામ્ય વિસ્તારોને શહેરમાં ભેળવી દેવામાં આવ્યા હોવા છતાં પૂરતો વિકાસ થયો નથી, અને સ્થાનિક રહીશો શાળાઓ, સિટી બસ સેવા, સફાઈ અને ગંદકીના પ્રશ્નો તેમજ પ્રાથમિક આરોગ્ય સેવાઓ જેવીસૂવિધાઓથી વંચિત રહ્યા છે, ત્યારે જો આગામી સમયમાં જનતાનો સહકાર મળશે અને આમ આદમી પાર્ટીની સરકાર બનશે તો નાગરિકોને આ તમામ પાયાગત સુવિધાઓ પ્રાથમિકતાના ધોરણે પૂરી પાડવામાં આવશે તેવો વિશ્વાસ વ્યક્ત કરવામાં આવી રહ્યો છે.
રાજ્યમાં કુલ સાડા 91 હજાર સહકારી મંડળીઓ છે
રાજ્યમાં સહકારી મંડળીઓમાં ચાલતી ગેરરીતિઓ અંગે આકરા પ્રહાર કરતા જણાવવામાં આવ્યું છે કે સમગ્ર ગુજરાતમાં હાલ કુલ સાડા 91 હજાર સહકારી મંડળીઓ નોંધાયેલી છે, જેમાંથી સાડા 81 હજાર મંડળીઓ કાર્યરત છે અને બાકીની બિનકાર્યરત મંડળીઓ પૈકી અંદાજે 400 જેટલી બોગસ મંડળીઓ સક્રિય હોવાનું સામે આવ્યું છે. આ બોગસ મંડળીઓનો મુખ્ય ઉપયોગ ચૂંટણીઓમાં જીત મેળવવા માટે કરવામાં આવતો હોવાનો ગંભીર આક્ષેપ કરાયો છે, જેમાં જૂનાગઢના માણાવદર અને ભેંસાણ સહિતના અનેક તાલુકાઓમાં બોગસ મંડળીઓ ખોલવામાં આવી હોવાની વિગતો રજૂ થઈ છે. આ મામલે એક ચોંકાવનારો કિસ્સો ટાંકાતા જણાવવામાં આવ્યું છે કે 2018માં જે વ્યક્તિનું અવસાન થઈ ચૂક્યું હોય તેના નામે પણ સહકારી મંડળી ખોલી નાખવામાં આવી હતી અને તે જ મંડળી થકી ૨૦૨૨માં મતદાન પણ કરાયું હતું. એક સમય એવો હતો જ્યારે સહકારી માળખું ખૂબ જ મજબૂત અને સારું હતું અને અમુલ જેવી સહકારી ક્ષેત્રની બ્રાન્ડ આખા વિશ્વમાં નામના પામી હતી, પરંતુ વર્તમાન સમયમાં ખેડૂતોને પાયમાલ કરવા અને ચૂંટણી જીતવા માટે આ પ્રકારે બોગસ મંડળીઓનું નેટવર્ક ઊભું કરવામાં આવ્યું હોવાનો ગંભીર દાવો કરવામાં આવ્યો છે.
ધારાસભ્ય ગોપાલ ઈટાલિયાએ સરકાર પર આકરા પ્રહાર કર્યા
વિધાનસભા સત્રના અંતિમ દિવસે આમ આદમી પાર્ટીના ધારાસભ્ય ગોપાલ ઈટાલિયાએ સરકાર પર આકરા પ્રહાર કરતા જણાવ્યું હતું કે ભાજપના નેતાઓ દેશને વિશ્વ ગુરુ બનાવવાની અને દુનિયામાં ડંકો વગાડવાની મોટી મોટી વાતો કરે છે, પરંતુ વાસ્તવિકતા એ છે કે શાળાઓમાં જ શિક્ષકો અને અધિકારીઓનો ડંકો વાગતો નથી. ગૃહમાં શિક્ષણ અંગે પૂછવામાં આવેલા પ્રશ્નોના સંદર્ભમાં તેમણે આક્ષેપ કર્યો હતો કે ભેંસાણ અને જૂનાગઢ સહિત અમરેલી જિલ્લામાં તાલુકા પ્રાથમિક શિક્ષણ અધિકારી (TPEO) ની જગ્યાઓ મોટા પ્રમાણમાં ખાલી પડેલી છે અને અમરેલીમાં ૨૦ માંથી ૧૪ જગ્યાઓ ખાલી છે, જ્યારે ભેંસાણમાં તો ૨૦૧૩ પછી આ પદ માટે કોઈ ભરતી જ કરવામાં આવી નથી. સરકાર માત્ર વંદે માતરમ્ ગાવાની કે ડેટા સેન્ટર અને એઆઈ (AI) ની વાતો કરે છે પરંતુ સરકારી શાળાઓમાં ગુરુઓ જ ન હોવાથી શિક્ષણની દુરદશા થઈ ગઈ છે અને ચૂંટણી સમયે મોટા વચનો આપનારા નેતાઓ પ્રજાના મૂળભૂત પ્રશ્નો હલ કરવામાં નિષ્ફળ રહ્યા છે
ગુજરાતમાં જલ જીવન મિશન અંગે કેગનો વિસ્ફોટક ઓડિટ રિપોર્ટ
ગુજરાતમાં 'જલ જીવન મિશન'ના અમલીકરણ અંગે કમ્પટ્રોલર એન્ડ ઓડિટર જનરલ (CAG) ના ઓડિટ રિપોર્ટમાં ગંભીર નાણાકીય ગેરરીતિઓ, નીતિગત નિષ્ફળતાઓ અને વહીવટી ઉદાસીનતા સામે આવી છે. કેગના રિપોર્ટ મુજબ, ખોટા WPI ઇન્ડેક્સ અને અયોગ્ય GST દર લાગુ કરવાના કારણે કોન્ટ્રાક્ટરોને ₹72.97 કરોડથી વધુ રકમની ચુકવણી કરવામાં આવી હતી, જેમાં GWIL અને GWSSB દ્વારા WPIના ખોટા ઉપયોગથી ₹54.32 કરોડ અને GSTના અયોગ્ય દરથી ₹18.65 કરોડનો સમાવેશ થાય છે. આ ઉપરાંત, MS પાઇપના ભાવફેર બદલ ₹38.92 કરોડ અને DI પાઇપમાં ખોટા બેઝ WPI થી ₹14.07 કરોડ ચૂકવાયા હતા. વર્ષ 2019થી 2024 દરમિયાન મળેલી ₹19,471.61 કરોડની ગ્રાન્ટમાંથી રાજ્યનો હિસ્સો સમયસર ન અપાતાં યોજના ₹3,179.31 કરોડના ફંડથી વંચિત રહી હતી, જ્યારે WASMOને ₹3,306.22 કરોડ એડવાન્સ અપાયા હતા અને સ્ટાફ ક્વાર્ટર્સ પાછળ ₹28.79 કરોડનો અનધિકૃત ખર્ચ કરાયો હતો.
તંત્રની ગંભીર બેદરકારી દર્શાવતા કેગના રિપોર્ટમાં જણાવાયું છે કે નીતિગત દેખરેખ માટે જવાબદાર SWSMની એપેક્સ અને એક્ઝિક્યુટિવ કમિટીની 2020થી 2024 દરમિયાન એક પણ બેઠક યોજાઈ ન હતી, જ્યારે જિલ્લા કક્ષાએ જરૂરી 55 બેઠકો સામે માત્ર 6થી 36 બેઠકો જ યોજાઈ હતી. રાજ્યની 11 જૂથ પાઇપલાઇન યોજનાઓમાંથી 5 યોજનાઓ 8થી 25 મહિના મોડી પૂર્ણ થઈ હતી, અને ઉમરેઠ, ભરૂચ તેમજ પાટણમાં કામ પૂર્ણ થયા છતાં સંપથી ESR સુધીના જોડાણ વિના યોજનાઓ બિનકાર્યરત રહી હતી. નમૂના તપાસ કરાયેલા 4 જિલ્લાઓમાં 14.84% ઘરોને નળ જોડાણ મળ્યા નથી. આ સાથે રાજ્યના 249 માંથી માત્ર 46 તાલુકાઓમાં જ પાણી ચકાસણી લેબ ઉપલબ્ધ છે, જ્યાં ચોમાસા પહેલાં અને પછીના પરીક્ષણમાં 24% થી 26% પાણીના નમૂના અયોગ્ય માલૂમ પડ્યા હતા. આ તમામ ખામીઓ અને નબળી વસૂલાતને કારણે ગ્રામ પંચાયતોનો બાકી પાણીવેરો 5 વર્ષમાં 70.05% વધીને ₹236.55 કરોડ પર પહોંચી ગયો છે.
ઇઝ ઓફ ડૂઈંગ બિઝનેસ વિધેયક પર કોંગ્રેસ આક્રમક
ગુજરાત ઇઝ ઓફ ડૂઈંગ બિઝનેસ વિધેયક પર આક્રમક પ્રહાર કરતા કોંગ્રેસના ધારાસભ્ય શૈલેષ પરમારે જણાવ્યું હતું કે સરકારે પહેલા રાજ્યમાં ફેલાયેલા બોગસ ડૉક્ટરોને શોધવા જોઈએ, કારણ કે આ બિલમાં બહારના ડૉક્ટરોને લાવવાની વાત છે અને કોઈ રજિસ્ટ્રેશન પણ નહીં કરવામાં આવે, તો સવાલ એ થાય કે ઉદ્યોગોને ડૉક્ટર સાથે શું લેવાદેવા છે અને બહારથી આવતો ડૉક્ટર સાચો છે કે બોગસ તેની કેવી રીતે ખબર પડશે? તેમણે શહેરી વિકાસના કાયદાને આ બિલમાં સાંકળવા સામે પણ સવાલો ઉઠાવતા કહ્યું હતું કે મહાનગરોમાં કેટલી વસ્તીને આધિન ફાયર સ્ટેશન હોવું જોઈએ તેનો જવાબ સંભવતઃ મંત્રી પાસે પણ નહીં હોય, વ્યાપક સ્તરે ફાયર સેફ્ટીના નિયમોનું પાલન થતું નથી અને ભૂતકાળમાં અમદાવાદ, સુરત તેમજ રાજકોટમાં બનેલી આગની દુર્ઘટનાઓમાં અનેક નિર્દોષ લોકોના જીવ ગયા છે.
શૈલેષ પરમારે ઉઠાવેલ મુદ્દાઓ પર સરકાર ફિક્સમાં મુકાઈ
ઈઝ ઓફ ડુઈંગ બિઝનેસ વિધેયક પર સરકાર ફિક્સમાં મુકાઈ હતી. કોંગ્રેસના ધારાસભ્ય શૈલેષ પરમારે ઉઠાવેલા અલગ અલગ મુદ્દાઓ પર સરકાર ભરાઈ હતી. શૈલેષ પરમારે કહ્યું હતું કે,કયા નિયમ હેઠળ અલગ અલગ વિભાગો ભેગા કર્યા જવાબ આપો. બહાર રહેલા સિનિયર મંત્રીઓ તરત ગૃહમાં પહોંચ્યા હતાં. સરકાર વતી મંત્રી ઋુષિકેશ પટેલે કહ્યું હતું કે, કામગીરી સરળ કરવા માટે આ કાયદો છે. કોઈને અલગ અલગ મંજૂરીઓ માટે નહીં જવું પડે. અલગ અલગ કાયદામાં સુધારો ન કરવો પડે એટલે એ કલેક્ટિવ બિલ છે.જો કે કયા નિયમો હેઠળ લાવ્યા એનો જવાબ મંત્રી ન આપ્યો
રમણલાલ વોરાએ શૈલેષ પરમારના મુદ્દા પર સહમતી દર્શાવી
ઇઝ ઓફ ડૂઈંગ બિઝનેસ વિધેયક અંગે કોંગ્રેસ દ્વારા ઉઠાવવામાં આવેલા સવાલોના જવાબમાં ભાજપના ધારાસભ્ય રમણલાલ વોરાએ શૈલેષ પરમારની વાત સાથે આંશિક સહમતિ દર્શાવતા જણાવ્યું હતું કે આ બિલ અંતર્ગત અલગ અલગ કાયદાઓમાં સુધારા જ કરવાના છે.કેબિનેટની સંયુક્ત જવાબદારીના ભાગરૂપે જે તે કાયદાઓમાં સુધારા કરવામાં આવતા હોય છે અને વિધાનસભાનો કિંમતી સમય બચે તેમજ સરળતાથી સુધારા થઈ શકે તે હેતુથી આ વિધેયક પર વિગતવાર ચર્ચા થવી અનિવાર્ય છે
ગુજરાત ઈઝ ઓફ ડૂઈંગ બિઝનેસ વિધેયક સામે કોંગ્રેસના સવાલો
ગુજરાત ઈઝ ઓફ ડૂઈંગ બિઝનેસ વિધેયક સામે સવાલો ઉઠાવતા કોંગ્રેસના ધારાસભ્ય શૈલેષ પરમારે સરકાર પાસે સ્પષ્ટતા માગી હતી કે કયા નિયમ હેઠળ આ નવું બિલ લાવવામાં આવ્યું છે અને અલગ-અલગ પાંચ અલગ વિભાગોના કાયદાઓને આમાં કેવી રીતે આવરી લેવામાં આવ્યા છે. તેમણે આક્ષેપ કર્યો હતો કે ભૂતકાળમાં જે વિધેયક પસાર થઈ ચૂક્યા છે અને જેને મંજૂરી મળી ગઈ છે તેમાં નિયમ મુજબ સુધારો લાવવાનો અધિકાર માત્ર જે તે સંબંધિત વિભાગ પાસે જ હોય છે, ત્યારે સરકાર કોઈ એક જ વિભાગ દ્વારા અન્ય વિભાગોના કાયદાઓમાં કેવી રીતે સુધારો કરી શકે?
ઈઝ ઓફ ડૂઈંગ બિઝનેસ વિધેયક 2026 રજૂ
વિધાનસભામાં રાજ્યના ઉદ્યોગ મંત્રી જયરામ ગામીત દ્વારા ગુજરાત ઈઝ ઓફ ડૂઈંગ બિઝનેસ વિધેયક 2026 રજૂ કરવામાં આવ્યું છે.જેનો મુખ્ય હેતુ વર્તમાન સમયમાં બિઝનેસ માટેની બિનજરૂરી પ્રક્રિયાઓ અને અલગ અલગ કાયદાઓની જટિલતાઓને દૂર કરવાનો છે જેથી એક જ કાયદા મુજબ નિયમો લાગુ પાડી શકાય. આ નવા વિધેયક હેઠળ પાંચ હયાત કાયદાઓ જેમાં ગુજરાત મેડિકલ કાઉન્સિલ એક્ટ 1967 ગુજરાત ફાયર પ્રિવેન્શન એન્ડ લાઈફ સેફ્ટી મેઝર્સ એક્ટ 2013,ગુજરાત એક્ટ 2013, ગુજરાત શોપ્સ એન્ડ એસ્ટાબ્લિશમેન્ટ્સ એક્ટ 2019 અને ગુજરાત માઈક્રો, સ્મોલ એન્ડ મીડિયમ એન્ટરપ્રાઈઝીસ એક્ટ 2019નો સમાવેશ થાય છે તેમાં સુધારો કરવામાં આવશે.આના પરિણામે વિવિધ કાયદાઓને બદલે માત્ર એક જ મંજૂરી લેવાની જરૂર પડશે અને પ્રક્રિયાઓ ઘટવાથી રાજ્યમાં નવા સાહસો શરૂ કરવામાં મોટી સરળતા રહેશે.
મહત્તમ વીજળી ખેડૂતોને આપવામાં આવે એવી સૂચના
રાજ્યમાં વીજળીની ઘટ અને તેના સંબંધિત રજૂઆતો અંગે નિવેદન આપતા સ્પષ્ટ કરવામાં આવ્યું છે કે જો કોઈ નાની કે મોટી મુશ્કેલી હશે તો તેને ત્વરિત ઉકેલવામાં આવશે, અને આ અંગે ઉર્જા વિભાગને સ્પષ્ટ સૂચનાઓ આપી દેવામાં આવી છે કે ખેડૂતોને કોઈપણ પ્રકારની અસુવિધા ન થાય અને તેમને મહત્તમ વીજળી પૂરી પાડવામાં આવે તે સુનિશ્ચિત કરવામાં આવે.
પાકના નુકસાનનો સર્વે કરીને ખેડૂતોને ન્યાય અપાશે
સરકારના મંત્રી ઋષિકેશ પટેલે કહ્યું હતું કે, રાજ્યના ખેડૂતો 99 ટકા પાક ધિરાણ નિયમિત પરત કરતા હોય છે અને જરૂર પડ્યે પુન ધિરાણ અપાય છે તેમજ પાક નુકસાન કે અછત સામે SDRFના નિયમો મુજબ જ સહાય આપવામાં આવે છે.આ સાથે સરકાર દ્વારા સ્પષ્ટ કરવામાં આવ્યું હતું કે પાંચ જિલ્લાઓમાં વરસાદની સ્થિતિ ચિંતાજનક હોવાથી ત્યાં પીવાનું પાણી,વીજળી અને સિંચાઈ માટે નર્મદાનું પાણી અનામત રાખવા સહિતની આગોતરી વ્યવસ્થાઓ ગોઠવી દેવાઈ છે, અને ચોમાસું પૂરું થતાં જ કલેક્ટરો દ્વારા ખરીફ પાકના નુકસાનનો સર્વે કરીને ખેડૂતોને યોગ્ય ન્યાય અપાવવાની કામગીરી હાથ ધરાશે
ખેડૂતોના દેવા માફી પર સરકારનું નિવેદન
ખેડૂતોના દેવા માફી અંગે સરકાર દ્વારા સ્પષ્ટ કરવામાં આવ્યું છે કે ગુજરાતના ખેડૂતો 99 ટકા જેટલું પાક ધિરાણ નિયમિતપણે પરત કરતા હોય છે અને ખેડૂતને જ્યારે પણ જરૂર પડે ત્યારે તેમને ફરીથી પાછું ધિરાણ પણ પૂરું પાડવામાં આવે છે, જેથી હાલ પ્રવર્તતી પરિસ્થિતિમાં સરકાર દ્વારા પાક ધિરાણ માફ કરવાના બદલે સ્ટેટ ડિઝાસ્ટર રિસ્પોન્સ ફંડ (SDRF) ના નિયમો અને માર્ગદર્શિકા મુજબ જ પાક નુકસાની કે અછત સામે સહાય આપવામાં આવશે.
કોંગ્રેસના ધારાસભ્ય વિમલ ચુડાસમાનું નિવેદન
વિધાનસભા ગૃહમાં ખેડૂતોની સ્થિતિ અંગે અવાજ ઉઠાવતા કોંગ્રેસના ધારાસભ્ય વિમલ ચુડાસમાએ સરકાર સમક્ષ સ્પષ્ટ સવાલ કર્યો હતો કે, જે ખેડૂતોનો પાક નિષ્ફળ ગયો છે તેમનું દેવું સરકાર માફ કરવા માંગે છે કે નહીં. તેમણે આક્ષેપ કર્યો હતો કે મંત્રીએ આ પ્રશ્નનો સીધો જવાબ આપવાને બદલે ખેડૂતો સમૃદ્ધ હોવાના દાવા કર્યા હતા. વિમલ ચુડાસમાએ ઉગ્ર માંગ કરી હતી કે જ્યાં પણ પાક નિષ્ફળ ગયો છે ત્યાં ખેડૂતોનું દેવું તાત્કાલિક માફ કરવામાં આવે અને રાજ્યના ઓછા વરસાદ ધરાવતા જિલ્લાઓમાં પશુપાલકો માટે વિનામૂલ્યે ઘાસચારો પૂરો પાડવામાં આવે.
ભલામણથી વરસાદ ના થાય કુદરત મહેરબાન હોય ત્યાં જ થાય
વિધાનસભા ગૃહમાં અછતની ચર્ચા દરમિયાન હળવાશ અને કટાક્ષનો માહોલ જોવા મળ્યો હતો, જ્યાં કોંગ્રેસના ધારાસભ્ય કિરીટ પટેલે સરકાર પર કટાક્ષ કરતા જણાવ્યું હતું કે વરસાદ પણ સરકાર જેવો છે જે ગમે ત્યાં વરસી પડે છે અને અમુક જગ્યાએ કોરું રાખે છે, તેમજ તાલુકા કક્ષાએ જ વરસાદ માપવાના સાધનો હોવાથી ગામડામાં વરસાદ ન દેખાય પણ તાલુકામાં નોંધાઈ જાય છે. આ રજૂઆત સામે હળવા મૂડમાં ટકોર કરતા નાયબ મુખ્યમંત્રી હર્ષ સંઘવીએ પલટવાર કર્યો હતો કે અગાઉ કોંગ્રેસના શાસનમાં વરસાદ માપવાના સાધનો માત્ર જિલ્લા કક્ષાએ જ રહેતા હતા, જ્યારે ભાજપ સરકાર દ્વારા તેને તાલુકા કક્ષા સુધી ઉપલબ્ધ કરાવવામાં આવ્યા છે, અને આ મામલે કટાક્ષ કરતા ઉમેર્યું હતું કે વરસાદ કોઈની ભલામણથી નથી પડતો પરંતુ કુદરતની મહેરબાનીથી જ વરસે છે.
કોંગ્રેસના ધારાસભ્ય ઈમરાન ખેડાવાલા બીજા દિવસે પણ ગેરહાજર
વંદે માતરમ વિવાદ બાદ કોંગ્રેસના ધારાસભ્ય ઇમરાન ખેડાવાળા સતત બીજા દિવસે પણ વિધાનસભા ગૃહમાં ગેરહાજર રહ્યા હતા, જેમાં ગઈકાલની જેમ આજે પણ તેમની અનુપસ્થિતિ રાજકીય વર્તુળોમાં ચર્ચાનો વિષય બની રહી હતી.
કોંગ્રેસે રાજ્યના ખેડૂતોના દેવા માફીની માગ કરી
રાજ્યમાં પ્રવર્તતી દુષ્કાળની પરિસ્થિતિને ધ્યાનમાં રાખીને કોંગ્રેસના ધારાસભ્ય વિમલ ચુડાસમા દ્વારા ખેડૂતોના દેવા માફી કરવાની જોરદાર માંગ કરવામાં આવી હતી, જેના જવાબમાં મંત્રી ઋષિકેશ પટેલે વિગતવાર જવાબો રજૂ કર્યા હતા અને કોંગ્રેસનો આગ્રહ સતત દેવા માફી પર જ સરકાર સ્પષ્ટ જવાબ આપે તેવો રહ્યો હતો.આ દરમિયાન ચર્ચા રસપ્રદ બનતાં વિધાનસભા અધ્યક્ષ શંકર ચૌધરીએ ભૂતપૂર્વ નાયબ મુખ્યમંત્રી નીતિન પટેલને યાદ કરતા હળવાશથી ટકોર કરી હતી કે જો નીતિનભાઈ હોત તો તેઓ કહેત કે આ સભ્યનું માત્ર સૂચન છે.
ખેડૂતોને આઠ કલાક વીજળી આપવા કોંગ્રેસની માગ
કોંગ્રેસના ધારાસભ્ય તુષાર ચૌધરીએ વિધાનસભા ગૃહમાં રજૂઆત કરતા જણાવ્યું હતું કે, રાજ્યના સાબરકાંઠા અને અરવલ્લી સહિતના કેટલાય જિલ્લાઓમાં આજે પણ ખેડૂતોને પૂરા 8 કલાક વીજળી મળતી નથી. જેથી ખેડૂતોને પૂરતી વીજળી પૂરી પાડવામાં આવે તેવી તેમણે માંગ કરી હતી.
ચોમાસુ પૂર્ણ થયા પછી પાક નુકશાની પર તપાસ થશે
ચોમાસુ પૂર્ણ થયા બાદ પાક નુકસાન અંગેની વિગતવાર તપાસ શરૂ કરવામાં આવશે અને જે પાકો નિષ્ફળ ગયા છે તેના સંદર્ભમાં ચોમાસા પછી જ યોગ્ય નિર્ણય લેવામાં આવશે તેમ મંત્રી ઋષિકેશ પટેલે વિધાનસભા ગૃહમાં નિવેદન આપ્યું હતું.
દુષ્કાળ જેવી સ્થિતિને પહોંચી વળવા આગોતરુ આયોજન કર્યુંઃ મંત્રી ઋષિકેશ પટેલ
આગામી 15 સપ્ટેમ્બર સુધી રાજ્યમાં વરસાદની આગાહી કરવામાં આવી છે. જેનાથી પોરબંદર, જામનગર, કચ્છ, સુરેન્દ્રનગર અને દેવભૂમિ દ્વારકા જેવા જિલ્લાઓમાં વર્તમાન વરસાદની ઘટને કારણે રાહત મળી શકે છે અને આ વિસ્તારોમાં હળવા ઝાપટાં તેમજ વરસાદ પડવાની પૂરી સંભાવના છે. દુષ્કાળ જેવી પરિસ્થિતિ અને તેના કારણે ઊભી થતી મુશ્કેલીઓને પહોંચી વળવા માટે સરકાર દ્વારા અગાઉથી જ આગોતરું આયોજન કરવામાં આવ્યું છે. જેના ભાગરૂપે નર્મદા ડેમમાં પીવાનું પાણી અનામત રાખીને ખેડૂતો માટે સિંચાઈ હેતુસર ૧૦ અને ૧૫ દિવસના તબક્કાવાર આયોજન મુજબ પાણી પૂરું પાડવામાં આવ્યું છે.
મંત્રી ઋષિકેશ પટેલે કોંગ્રેસના સવાલનો જવાબ આપ્યો
જામનગર, દ્વારકા અને કચ્છ સહિતના પાંચ જિલ્લાઓમાં વરસાદની ઘટને લઈને વિધાનસભા ગૃહમાં નિવેદન આપતા મંત્રી ઋષિકેશ પટેલે જણાવ્યું હતું કે રાજ્ય સરકાર વૈજ્ઞાનિક અભિગમ સાથે કામ કરી રહી છે અને દુષ્કાળ જાહેર કરવા માટે વરસાદ, ભેજનું પ્રમાણ અને સર્વે એમ ત્રણ ટ્રિગરના આધારે સ્થિતિ નક્કી કરવામાં આવે છે. આ જિલ્લાઓમાં સિંચાઈ, પીવાના પાણી અને વાવેતરની સ્થિતિનો અભ્યાસ કરીને વધારાની જરૂરી વીજળી પૂરી પાડવામાં આવી રહી છે, તેમજ પશુપાલકો માટે તાત્કાલિક ઘાસચારો ઉપલબ્ધ કરાવીને ૫ પશુની મર્યાદામાં ૨ રૂપિયા પ્રતિ કિલોના ભાવે ઘાસનું વિતરણ કરવામાં આવી રહ્યું છે, સાથે જ પરિસ્થિતિને પહોંચી વળવા માટે જિલ્લા કલેક્ટરોને પણ જરૂરી કામગીરી કરવાની વિશેષ સત્તા આપવામાં આવી છે.
રાજ્ય સરકારે દુષ્કાળની સ્થિતિમાં શું પગલાં લીધા: કોંગ્રેસ
ગુજરાતમાં આ વર્ષે વરસાદ ખૂબ જ ઓછો પડ્યો છે. જેને કારણે દુષ્કાળજનક સ્થિતિનું સર્જન થયું છે. આ સ્થિતિને લઈને કોંગ્રેસના ધારાસભ્ય તુષાર ચૌધરીએ નિયમ 116 હેઠળ વિધાનસભામાં દુષ્કાળનો મુદ્દો ઉઠાવ્યો છે. તેમણે કહ્યું હતું કે, રાજ્યમાં જિલ્લાઓમાં નહીંવત વરસાદના કારણે દુષ્કાળ જેવી સ્થિતિ સર્જાઈ છે. અનેક તાલુકાઓમાં વરસાદ ઓછો છે. સરકારે આ પરિસ્થિતિમાં શું પગલાં લીધા તેની માહિતી આપવામાં આવે
રાજ્યમાં રેશનકાર્ડ ધારકોની 97 ટકા ઈ કેવાયસીની પ્રક્રિયા પૂર્ણ
રાજ્યમાં અન્ન અને નાગરિક પુરવઠા વિભાગ દ્વારા રેશનકાર્ડ ધારકો માટે 97 ટકા ઈ-કેવાયસીની પ્રક્રિયા સફળતાપૂર્વક પૂર્ણ કરી દેવામાં આવી હોવાની માહિતી પુરવઠા મંત્રીએ વિધાનસભા ગૃહમાં આપી હતી.જેમાં કુલ ચાર અલગ અલગ પ્રકારે વેરિફિકેશન કરવાની સુવિધા ઉપલબ્ધ હોવાનું જણાવાયું હતું.જોકે,આ મુદ્દે ચર્ચા દરમિયાન કોંગ્રેસના નેતા તુષાર ચૌધરીએ ઈ-કેવાયસીની કામગીરીમાં રહેલી ખામીઓ તરફ ધ્યાન દોરતા જણાવ્યું હતું કે,શ્રમિકોના હાથે મજૂરી કામ કરવાને કારણે આંગળા ઘસાઈ જવાથી ફિંગરપ્રિન્ટ વેરિફિકેશન થવામાં મુશ્કેલી પડે છે તેમજ આધાર અને રેશનકાર્ડમાં નામની અસંગતતા કે ભૂલ હોવાને કારણે પણ અનેક શ્રમિકોનું ઈ-કેવાયસી સહેલાઈથી થઈ શકતું નથી.આ રજૂઆતના જવાબમાં સરકારે સ્પષ્ટતા કરી હતી કે જ્યાં પણ આવી વાસ્તવિક મુશ્કેલીઓ કે જરૂરિયાત ઊભી થશે, ત્યાં સંબંધિત માહિતી આપવાથી તેનો યોગ્ય ટેકનિકલ કે વહીવટી રસ્તો કાઢવામાં આવશે.
ડેટા સેન્ટરના નિર્માણ બાદ વીજળી અને પાણીનો મોટો વપરાશ
ડેટા સેન્ટરના નિર્માણ બાદ વીજળી અને પાણીનો વપરાશ ખૂબ મોટો થવાની કોંગ્રેસના ધારાસભ્ય દ્વારા વ્યક્ત કરવામાં આવેલી ચિંતાને સાયન્સ એન્ડ ટેકનોલોજી મંત્રી અર્જુન મોઢવાડિયાએ વ્યાજબી ગણાવી હતી.જોકે તેના જવાબમાં મંત્રીએ સ્પષ્ટતા કરી હતી કે ગુજરાતની ડેટા સેન્ટર નીતિ સમગ્ર દેશમાં એકમાત્ર એવી નીતિ છે જેમાં વીજળી અને પાણીના વપરાશની અગાઉથી જ ચોક્કસ જોગવાઈ કરવામાં આવી છે.આ નીતિ અંતર્ગત ડેટા સેન્ટરમાં 51 ટકા ગ્રીન એનર્જીનો ઉપયોગ કરવાનું ફરજિયાત બનાવવામાં આવ્યું છે અને આ ક્ષેત્રે ગુજરાત દેશમાં પ્રથમ ક્રમે હોવાનો દાવો પણ મંત્રીએ કર્યો હતો.તેમજ રાજ્ય વીજળીની બાબતમાં સરપ્લસ હોવાનું જણાવ્યું હતું.ડેટા સેન્ટરોમાં પાણીનો વપરાશ પણ વધુ થતો હોવાથી ગુજરાતની નીતિમાં પાણીને રિસાયકલ કરીને તેનો પુનઃઉપયોગ કરવો ફરજિયાત બનાવવામાં આવ્યો હોવાનું પણ મંત્રીએ ઉમેર્યું હતું.
ડેટા સેન્ટર અંગેની પ્રશ્નોત્તરી, અર્જુન મોઢવાડિયાનું નિવેદન
સાયન્સ એન્ડ ટેકનોલોજી મંત્રી અર્જુન મોઢવાડિયાએ વિધાનસભામાં ડેટા સેન્ટર અંગેની પ્રશ્નોત્તરીમાં મહત્વનું નિવેદન આપતા જણાવ્યું હતું કે,વિશ્વભરનો 30 ટકા ડેટા ભારત પાસે ઉપલબ્ધ છે.જો કે આપણી પોતાની સંગ્રહ ક્ષમતા હાલ માત્ર 2 ટકા જ છે.આ સ્થિતિને બદલવા અને ડેટા સંગ્રહ ક્ષમતામાં વધારો કરવા માટે સરકારે દેશમાં કુલ 7.5 ગીગાવોટની ક્ષમતા ઉભી કરવાનું મોટું લક્ષ્યાંક નિર્ધારિત કર્યું છે.મંત્રીએ વધુમાં ઉમેર્યું હતું કે,રાજ્ય સરકારની અનુકૂળ નીતિઓને કારણે રોકાણકારોનો ઉત્સાહ બેવડાયો છે.જેના પરિણામે ગુજરાત પાસે અત્યારે માત્ર ડેટા સેન્ટર સ્થાપવા માટે જ 17 ગીગાવોટ ક્ષમતાની માગ સાથેની અરજીઓ પ્રાપ્ત થઈ છે.આ તમામ બાબતો રાજ્ય સરકારની પ્રોત્સાહક ઔદ્યોગિક નીતિ અને પારદર્શક વહીવટનું સીધું પરિણામ છે.
આ પણ વાંચોઃ Rajkot News:લ્યો બોલો મનપાના નગરસેવકોને મોંઘવારી નડી! પગારમાં વધારો કરવા માંગ કરી