રાજ્યમાં કોડીનયુક્ત દવાઓ અને નશાકારક સિરપના ગેરકાયદે વેચાણને નાબૂદ કરવા માટે આરોગ્ય મંત્રીની કડક સૂચના બાદ ફૂડ એન્ડ ડ્રગ્સ વિભાગ દ્વારા સમગ્ર રાજ્યમાં એક સાથે સ્પેશિયલ ચેકિંગ ડ્રાઇવ શરૂ કરવામાં આવી છે.
રાજ્યવ્યાપી સ્પેશિયલ ડ્રાઇવ શરૂ
આ ડ્રાઇવ દરમિયાન અમદાવાદ ગ્રામ્ય વિસ્તારમાં આવેલી 'બાલાજી ફાર્મા' ખાતે દરોડો પાડવામાં આવ્યો હતો. જ્યાંથી ફૂડ એન્ડ ડ્રગ્સ વિભાગે નિયમોના ભંગ બદલ રૂ. 83.07 લાખની કિંમતનો 'Rexton-T Syrup' નો મોટા પ્રમાણનો જથ્થો પ્રતિબંધિત (Stop-Sale) કરીને ફ્રીઝ કરી દીધો છે.તપાસનો ધમધમાટ આગળ ધપાવતા ગાંધીનગર જિલ્લાના કલોલ ખાતે આવેલી 'હેલ્થ પોઇન્ટ ફાર્મા' દ્વારા કોડીનયુક્ત દવાઓના વેચાણના નિયમોનો ગંભીર ભંગ કરાયો હોવાનું સામે આવ્યું હતું, જેના પગલે તંત્ર દ્વારા આ પેઢીનો દવા વેચાણનો પરવાનો (લાઇસન્સ) તાત્કાલિક અસરથી રદ કરી દેવામાં આવ્યો છે.