ગુજરાત પોલીસે ટેક્નોલોજીનો શ્રેષ્ઠ ઉપયોગ કરીને સાયબર સુરક્ષા અને નાગરિકોના હિતમાં એક મોટો સીમાચિહ્ન સર કર્યો છે. ખોવાયેલા કે ચોરાયેલા મોબાઈલ ફોન શોધી કાઢવાના અભિયાનમાં ગુજરાતે ઉત્કૃષ્ટ પ્રદર્શન કરી દેશના મોટા રાજ્યોમાં બીજું સ્થાન પ્રાપ્ત કર્યું છે. ગુજરાતનો મોબાઈલ રિકવરી દર રાષ્ટ્રીય સરેરાશ 37.4% ની સામે પ્રભાવશાળી 50.75% જેટલો ઊંચો નોંધાયો છે, જે દર્શાવે છે કે રાજ્યમાં ડિજિટલ અપરાધો સામે પોલીસ કેટલી સક્રિય છે.
74,823 મૂળ માલિકોને પાછા મળ્યા
રાજ્યમાં સેન્ટ્રલ ઇક્વિપમેન્ટ આઈડેન્ટિટી રજિસ્ટ્રાર (CEIR) પોર્ટલના સચોટ અમલીકરણના પરિણામે અત્યાર સુધીમાં 2.38 લાખથી વધુ મોબાઇલ હેન્ડસેટ સફળતાપૂર્વક બ્લોક કરવામાં આવ્યા છે. આ ઉપરાંત ટેક્નોલૉજીની મદદથી 1.47 લાખથી વધુ મોબાઈલ ટ્રેસ કરવામાં આવ્યા છે, જેમાંથી 74,823 મૂળ માલિકોને તેમના કિંમતી મોબાઈલ ફોન સન્માનપૂર્વક પરત સોંપવામાં આવ્યા છે. નાણાકીય વર્ષ 2026-27ના પ્રથમ છ મહિનાના પ્રદર્શનમાં આણંદ જિલ્લો પ્રથમ ક્રમે અને ડાંગ જિલ્લો બીજા ક્રમે રહીને શાનદાર કામગીરી બતાવી છે.