આરોગ્ય મંત્રી પ્રફુલ પાનશેરીયાએ ગઈકાલ મોડી રાત્રે અચાનક ગાંધીનગર સિવિલ હોસ્પિટલની મુલાકાત લઈને ડેન્ગ્યુની સારવાર લઈ રહેલા જવાનોના સ્વાસ્થ્ય અંગે તાકીદની સમીક્ષા કરી હતી.મંત્રીએ હોસ્પિટલમાં દાખલ જવાનોના ખબર-અંતર પૂછી તેમનું મનોબળ વધાર્યું હતું.આ સાથે જ તેમણે સિવિલ હોસ્પિટલના તબીબો અને સુપ્રિન્ટેન્ડેન્ટ સાથે બેઠક યોજી જવાનોને આપવામાં આવી રહેલી સારવારની વિગતવાર માહિતી મેળવી હતી.કેવડિયા સ્થિત સ્ટેચ્યુ ઓફ યુનિટી ખાતે આયોજિત પરેડ કાર્યક્રમમાં ભાગ લેવા માટે દેશના વિવિધ રાજ્યોમાંથી ગુજરાત આવેલા સુરક્ષા દળોના જવાનોની આરોગ્ય વિષયક સ્થિતિ અંગે આરોગ્ય મંત્રી પ્રફુલ પાનશેરીયાએ વિગતો આપી હતી.
કોઈ પણ જવાનની સ્થિતિ ગંભીર નથી
મંત્રી પ્રફુલ પાનશેરીયાએ જણાવ્યુ હતું કે,ઓરિસ્સા, ઝારખંડ, દિલ્હી, પશ્ચિમ બંગાળ અને છત્તીસગઢથી આવેલા BSF, CRPF તથા ITBPના આશરે 87 જવાનોને તાવ અને અન્ય શારીરિક અસ્વસ્થતાની ફરિયાદ બાદ તાત્કાલિક ગાંધીનગર સિવિલ હોસ્પિટલ ખાતે સારવાર અર્થે ખસેડવામાં આવ્યા હતા.તબીબોની સઘન સારવાર અને યોગ્ય સંભાળને કારણે જવાનોની તબિયતમાં ઝડપી સુધારો નોંધાયો છે.છેલ્લા 10 દિવસ મા કુલ 87 દાખલ થયેલ જેમાંથી 50 જવાનો પૂર્ણપણે સાજા થઈ જતાં તેમને હોસ્પિટલમાંથી રજા આપી દેવામાં આવી છે.જ્યારે બાકીના 37 જવાનો હાલ સિવિલ હોસ્પિટલમાં સારવાર હેઠળ છે.મંત્રીએ ઉમેર્યું હતું કે,હાલ તમામ 37 જવાનોનું સ્વાસ્થ્ય સ્થિર અને સુધારા પર છે તથા કોઈ પણ જવાનની સ્થિતિ ગંભીર નથી.