ગુજરાતમાં નેશનલ હાઈવે અને એક્સપ્રેસ-વેના પ્રોજેક્ટ્સને વધુ ગતિ આપવા માટે ગાંધીનગરમાં એક મહત્વપૂર્ણ ઉચ્ચ સ્તરીય બેઠક યોજાઈ હતી. ભારત સરકારના માર્ગ પરિવહન અને રાજમાર્ગ મંત્રી નીતિન ગડકરી અને ગુજરાતના મુખ્યમંત્રી ભૂપેન્દ્ર પટેલે વરિષ્ઠ સચિવો સાથે રાજ્યના રાષ્ટ્રીય ધોરીમાર્ગોના કામોની સર્વગ્રાહી સમીક્ષા કરી હતી. અગાઉ નવેમ્બર-2025માં યોજાયેલી બેઠક બાદ થયેલી પ્રગતિ અંગે કેન્દ્રીય મંત્રીએ સંતોષ વ્યક્ત કર્યો હતો. આ બેઠકમાં લેવાયેલા નિર્ણયો મુજબ, બહુપ્રતીક્ષિત અમદાવાદ-ધોલેરા એક્સપ્રેસ-વે પ્રોજેક્ટને હવે ભાવનગર સુધી લંબાવવામાં આવશે અને તેની કામગીરી આગામી ત્રણ મહિનામાં જ શરૂ કરી દેવાશે.
વિસ્તૃત પ્રેઝન્ટેશન રજૂ કરાયુ
બેઠક દરમિયાન મુખ્યમંત્રીના સલાહકાર એસ. એસ. રાઠૌરે એક વિસ્તૃત પ્રેઝન્ટેશન રજૂ કર્યું હતું. જેમાં વડોદરા-મુંબઈ નેશનલ હાઈવે-48 સિક્સ લેન, મોરબી-સામખિયાળી માર્ગ, રાજકોટ-ગોંડલ-જેતપુર રોડ, અમદાવાદ-વડોદરા એક્સપ્રેસ-વે, અમદાવાદ-ગોધરા-ઇન્દોર રોડ તેમજ જામનગર-અમૃતસર એક્સપ્રેસ-વે અને અમદાવાદ-શામળાજી સિક્સ લેન પ્રોજેક્ટની વર્તમાન સ્થિતિની સમીક્ષા કરવામાં આવી હતી. મુખ્યમંત્રી ભૂપેન્દ્ર પટેલે પાલનપુર-સામખિયાળી કોરિડોરના માર્ગ વિસ્તરણના કામોમાં વધુ ઝડપ લાવવા કેન્દ્રીય મંત્રીને ખાસ અનુરોધ કર્યો હતો.
