વડાપ્રધાન નરેન્દ્ર મોદીની આગામી ગાંધીનગર મુલાકાતને ધ્યાનમાં રાખીને સુરક્ષા વ્યવસ્થાને વધુ સઘન બનાવવામાં આવી છે. વહીવટી તંત્ર અને પોલીસ વિભાગ દ્વારા વીઆઈપી મૂવમેન્ટને લઈને ખાસ તકેદારી રાખવામાં આવી રહી છે, જેના ભાગરૂપે જિલ્લા કલેક્ટર દ્વારા એક મહત્વપૂર્ણ જાહેરનામું બહાર પાડવામાં આવ્યું છે. આ જાહેરનામા અનુસાર ગાંધીનગરના કેટલાક મુખ્ય માર્ગો પર સામાન્ય વાહનોની આવાગમન પર પ્રતિબંધ મૂકવામાં આવ્યો છે.

અક્ષરધામ સર્કલથી ઇન્દ્રોડા સર્કલ સુધીનો માર્ગ બંધ

મંત્રી નિવાસસ્થાન તરફ જતા અને તે આસપાસના વિસ્તારોમાં સુરક્ષાના કડક બંદોબસ્તના ભાગરૂપે, અક્ષરધામ સર્કલથી લઈને ઇન્દ્રોડા સર્કલ સુધીના પટ્ટા પર સામાન્ય વાહનોના પ્રવેશ પર પ્રતિબંધ રહેશે. આ નિયમ હેઠળ નિર્ધારિત સમયગાળા દરમિયાન આ માર્ગ પરથી સામાન્ય વાહનો પસાર થઈ શકશે નહીં.

ક્યારે અને કેટલા સમય સુધી રહેશે પ્રતિબંધ?

ગાંધીનગર જિલ્લા કલેક્ટર દ્વારા બહાર પાડવામાં આવેલા આદેશ મુજબ, આ પ્રતિબંધ 13 નવેમ્બરના રોજ સાંજના 4 વાગ્યાથી શરૂ થઈને 14 નવેમ્બરના રોજ બપોરે 12 વાગ્યા સુધી અમલમાં રહેશે. આ સમયગાળા દરમિયાન મુસાફરો કે વાહનચાલકોએ અસુવિધાથી બચવા માટે વૈકલ્પિક માર્ગોનો ઉપયોગ કરવાનો રહેશે.

વાહનચાલકો માટે વૈકલ્પિક રૂટ, ચ રોડ અને ઘ રોડ

નાગરિકો અને વાહનચાલકોને ટ્રાફિકની સમસ્યાનો સામનો ન કરવો પડે તે માટે વહીવટી તંત્ર દ્વારા વૈકલ્પિક વ્યવસ્થા જણાવવામાં આવી છે. પ્રતિબંધિત વિસ્તારમાંથી પસાર થતા વાહનચાલકો મુખ્ય માર્ગને બદલે ચ રોડ અને ઘ રોડ નો ઉપયોગ કરીને પોતાના ગંતવ્ય સ્થાન સુધી પહોંચી શકશે.

જિલ્લા વહીવટી તંત્રની નાગરિકોને અપીલ

વીઆઈપી સુરક્ષા અને કાયદો-વ્યવસ્થા જાળવવા માટે તંત્ર દ્વારા લેવાયેલા આ પગલાંમાં નાગરિકો સહકાર આપે તેવી અપીલ કરવામાં આવી છે. વાહનચાલકોએ સમયસર પોતાના ગંતવ્ય સ્થાને પહોંચવા માટે વૈકલ્પિક રસ્તાઓનો ઉપયોગ કરવા અને ટ્રાફિક નિયમોનું પાલન કરવા અનુરોધ કરાયો છે.


આ પણ વાંચો: Ahmedabad: 13 નવેમ્બરથી PM Modi ગુજરાતના પ્રવાસે, 14મીએ અંબાજી મંદિરે કરશે દર્શન-પૂજા