તાજેતરમાં IGP મકરંદ ચૌહાણે ગાંધીનગરમાં જ ફરજ બજાવતા PIને કાળા કાચ અને નંબર પ્લેટ વિનાની કાર સાથે ઝડપ્યા હતાં. આ ઘટનાને લઈને હવે પોલીસ કર્મીઓ સામે ટ્રાફિક નિયમો માટેની ડ્રાઈવ શરૂ કરવામાં આવી છે. આજથી 5મી ઓક્ટોબર સુધી સમગ્ર રાજ્યના પોલીસ કર્મીઓ સામે ખાસ ટ્રાફિક ડ્રાઈવ યોજવામાં આવશે. ટ્રાફિક નિયમોનું પાલન કરાવતી પોલીસ જ નિયમો નેવે મુકે ત્યારે વિભાગની છબી પર સવાલો ઉભા થાય છે.
આજથી પોલીસ માટે ટ્રાફિક ડ્રાઈવ શરૂ
ગાંધીનગરમાં IGP મકરંદ ચૌહાણે એક કાર પકડી હતી. જેમાં કાળા કાચ અને નંબર પ્લેટ નહોતી. આ કારની તપાસ કરતાં તે ગાંધીનગરમાં ફરજ બજાવતા એક પોલીસ ઈન્સપેક્ટરની હોવાનું સામે આવ્યું હતું. રાજ્યમાં લોકો સામે જ્યારે ટ્રાફિક ડ્રાઈવ કરીને મસમોટો દંડ વસૂલ કરવામાં આવતો હોય છે. ત્યારે પોલીસ વિભાગના જ કર્મચારીઓ સરેઆમ નિયમોનો ભંગ કરતા હોવાથી વિભાગની છબી સામે સવાલો ઉભા થાય છે. જેથી હવે પોલીસ વડાની કચેરીએથી જ ગંભીર નોંધ લેવાયા બાદ IGP મકરંદ ચૌહાણ દ્વારા તમામ પોલીસ કમિશનરો અને જિલ્લા પોલીસ વડાઓને કડક સૂચનાઓ આપી દેવામાં આવી છે.