અમરેલીમાં ગૌવંશ હત્યાના કેસમાં કોર્ટે આપેલા કડક ચુકાદા અંગે રાજ્યના પૂર્વ મંત્રી જીતુ વાઘાણીએ નિવેદન આપ્યું છે. તેમણે જણાવ્યું હતું કે ગુજરાતમાં કડક કાયદાનો સફળતાપૂર્વક અમલ કરવાથી જ આ ચુકાદો આવ્યો છે. આ કેસમાં ઝડપાયેલા ત્રણ આરોપીઓ સામે પોલીસ દ્વારા તાત્કાલિક ચાર્જશીટ ફાઇલ કરવામાં આવી હતી, જેના પરિણામે કોર્ટે આરોપીઓને આજીવન કેદની સજા અને રૂપિયા 5 લાખનો દંડ ફટકાર્યો છે. વાઘાણીએ સ્પષ્ટપણે જણાવ્યું કે આ ચુકાદો ગૌવંશ હત્યા જેવી પ્રવૃત્તિઓ કરતા લોકો માટે એક ચેતવણીરૂપ છે.
મોદીના કાર્યકાળમાં કાયદાનો અમલ
જીતુ વાઘાણીએ વધુમાં ઉમેર્યું હતું કે ગૌવંશ હત્યાને રોકવા માટેના આ કડક કાયદાનો અમલ ગુજરાતમાં નરેન્દ્ર મોદી જ્યારે મુખ્યમંત્રી હતા, તે સમય દરમિયાન કરવામાં આવ્યો હતો. આ કાયદાના કારણે રાજ્યમાં ગૌવંશની હત્યાના કિસ્સાઓમાં ઘટાડો નોંધાયો છે અને ગૌરક્ષાને મજબૂતી મળી છે. આ કાયદાની જોગવાઈઓ એટલી કડક છે કે ભવિષ્યમાં પણ ગૌવંશ હત્યાના આરોપીઓને આજીવન કારાવાસની સજા થઈ શકે છે. વાઘાણીએ સરકારની ઈચ્છાશક્તિ અને કાયદાના કડક અમલવારીને આ સફળ ચુકાદા માટે મહત્ત્વપૂર્ણ ગણાવી.
