ગુજરાત રાજ્ય વેરહાઉસિંગ કોર્પોરેશન દ્વારા કૃષિ પેદાશોના સંગ્રહ માટે ભાડે લેવામાં આવતા ગોડાઉનના ભાડા પર હવે 18 ટકા જીએસટી ચૂકવવો પડશે. ગુજરાત ઓથોરિટી ફોર એડવાન્સ રુલિંગએ સ્પષ્ટ કર્યું છે કે ગોડાઉનમાં મગફળી, ચણા, તુવેર, મગ સહિતની કૃષિ પેદાશોનો સંગ્રહ થતો હોવા છતાં ગોડાઉનનું ભાડું જીએસટીમાંથી મુક્ત ગણાશે નહીં.
ગોડાઉન ભાડે લેવાની સેવા અલગ બાબત
કોર્પોરેશન NAFED અને NCCF જેવી સંસ્થાઓ વતી કૃષિ પેદાશોના સંગ્રહ અને વેરહાઉસિંગની કામગીરી કરે છે.આ કામગીરી માટે કોર્પોરેશન પોતાના ગોડાઉન ઉપરાંત અન્ય વ્યક્તિઓ પાસેથી પણ ગોડાઉન ભાડે લે છે.આવા ગોડાઉનના ભાડા પર જીએસટી લાગશે કે નહીં અને કર લાગતો હોય તો તેની ચૂકવણી ઉલટા કરવેરા પદ્ધતિ હેઠળ કરવી કે સામાન્ય પદ્ધતિ હેઠળ,તે અંગે કોર્પોરેશને અગ્રિમ ચુકાદા સત્તામંડળ સમક્ષ પ્રશ્ન કર્યો હતો.AARએ ચુકાદામાં જણાવ્યું કે કૃષિ પેદાશોના સંગ્રહ અને વેરહાઉસિંગની સેવા અલગ બાબત છે અને ગોડાઉન ભાડે લેવાની સેવા અલગ બાબત છે.