ગીર સોમનાથ જિલ્લામાંથી એક અત્યંત દુઃખદ અને હચમચાવી નાખતી અકસ્માતની ઘટના સામે આવી છે. ધોકડવા બેડીયા રોડ પર પૂરઝડપે દોડતા ડમ્પર અને બાઈક વચ્ચે ધડાકાભેર ટક્કર સર્જાતા ગમખ્વાર અકસ્માત સર્જાયો હતો. આ ભયાનક અકસ્માતમાં IIFL ફાઈનાન્સ કંપનીમાં ફરજ બજાવતા કર્મચારીનું ઘટનાસ્થળે જ કમકમાટીભર્યું મોત નીપજ્યું છે, જેને કારણે સમગ્ર પંથકમાં શોકનું મોજુ ફરી વળ્યું છે.
સવારે નોકરી જતા સમયે સર્જાયેલી દુર્ઘટનામાં માથામાં ગંભીર ઈજા
મળતી માહિતી મુજબ, મૃતક યુવક ઉમેજ ગામના રહેવાસી હિંમતભાઈ વાળા હોવાનું સામે આવ્યું છે. હિંમતભાઈ સવારના સુમારે પોતાના બાઈક પર સવાર થઈને ધોકડવા તરફ જઈ રહ્યા હતા તે દરમિયાન આ ગંભીર દુર્ઘટના ઘટી હતી. ડમ્પરની ટક્કર એટલી જોરદાર હતી કે બાઈકચાલક હિંમતભાઈ ફંગોળાઈને નીચે પટકાયા હતા અને તેમના માથાના ભાગે ગંભીર ઈજાઓ પહોંચી હતી. લોહીલુહાણ હાલતમાં તેમણે ઘટનાસ્થળે જ અંતિમ શ્વાસ લીધા હતા, જેના કારણે પરિવાર પર આભ તૂટી પડ્યું છે.