સાબરકાંઠા જિલ્લામાંથી સામાજિક સમરસતાને ડહોળતી એક ગંભીર ઘટના સામે આવી છે. ઇડર તાલુકાના ડુંગરી ગામે દલિત અને પટેલ સમાજ વચ્ચે મરણ પ્રસંગે ઉપયોગમાં લેવાતા નાવણિયા (નાહવાની જગ્યા) ના મામલે ભારે બબાલ સર્જાઈ હતી. સામાન્ય રીતે ગામમાં દલિત સમાજમાં મરણ પ્રસંગે મહિલાઓ સ્નાન કરવા માટે જતી હોય છે, પરંતુ આ નાવણિયાના ઉપયોગ અને તેના પરના માલિકી કે કબજાના મુદ્દે વિવાદ ઉગ્ર બન્યો હતો. વાત એટલી વધી ગઈ કે બંને સમાજો સામસામે આવી ગયા હતા અને પથ્થરમારાની ઘટનાને કારણે આખા ગામમાં ભારે અફરાતફરી તથા ભયનો માહોલ છવાઈ ગયો હતો.
પટેલ સમાજ દ્વારા તાળા તોડવાના આક્ષેપ
પ્રાપ્ત વિગતો અનુસાર, પટેલ સમાજ દ્વારા નાવણિયાના તાળા તોડી નાખવામાં આવ્યા હોવાના ગંભીર આક્ષેપો કરવામાં આવ્યા છે, જેના કારણે મામલો વધુ ગરમાયો હતો. આ ધીંગાણા દરમિયાન થયેલા પથ્થરમારામાં દલિત સમાજના બે વ્યક્તિઓ ઉપરાંત કાયદો અને વ્યવસ્થા સંભાળવા પહોંચેલા એક પોલીસ કર્મી પણ ગંભીર રીતે ઘાયલ થયા હતા. અચાનક ફાટી નીકળેલી આ હિંસાના કારણે ગામમાં તંગદિલી વ્યાપી ગઈ હતી અને ઘટનાની ગંભીરતા જોતા તાત્કાલિક ધોરણે ઉચ્ચ પોલીસ કાફલો ઘટનાસ્થળે દોડી ગયો હતો.