Jamnagarમાં એક યુવકે પ્રેમિકાને જાહેરમાં ફટકારી, નિર્ભયતાથી યુવતીને માર મારતો વીડ્યો વાયરલ

જામનગર શહેરમાં એક ચોંકાવનારી ઘટના સામે આવી હતી. જેમાં એક યુવક દ્વારા તેની પ્રેમિકાને જાહેરમાં ઢોર માર મારવામાં આવ્યો હતો. આ ઘટનાનો વીડિયો સોશિયલ મીડિયા પર વાયરલ થતા ભારે આક્રોશ ફેલાયો હતો. પોલીસે તાત્કાલિક કાર્યવાહી કરીને આરોપીને ઝડપી પાડ્યો હતો. આ ઘટના શહેરના જાણીતા સ્થળ રણમલ તળાવની પાળ પાસે બની હતી. વીડિયોમાં સ્પષ્ટપણે જોવા મળ્યું હતું કે એક યુવક તેની સ્ત્રી-મિત્રને બેફામ રીતે માર મારી રહ્યો હતો.

વીડિયો વાયરલ થયા બાદ જામનગર પોલીસ થઈ સક્રિય 

આસપાસ લોકોની અવરજવર હોવા છતાં આ યુવકે નિર્ભયતાથી આ કૃત્ય કર્યું હતું. આ ઘટનાનો વીડિયો સોશિયલ મીડિયા પર વાયરલ થયા બાદ જામનગર પોલીસ સક્રિય થઈ હતી. સિટી એ ડિવિઝન પોલીસ સ્ટેશન દ્વારા આ મામલે તાત્કાલિક ગુનો દાખલ કરવામાં આવ્યો હતો. પોલીસ દ્વારા વીડિયોના આધારે માર મારનાર ઈસમની ઓળખ વકીદ પટણી તરીકે કરવામાં આવી હતી.

ગણતરીના કલાકોમાં જ આરોપીને ઝડપી પાડ્યો

ત્યારબાદ પોલીસે ગણતરીના કલાકોમાં જ આરોપીને ઝડપી પાડ્યો હતો અને તેને કાયદાના પાઠ ભણાવ્યા હતા. આ પ્રકારની ઘટનાઓ સમાજમાં વધતી હિંસા અને મહિલા સુરક્ષા પર ગંભીર સવાલો ઉભા કરતી હોય છે. કોઈ પણ સંજોગોમાં વ્યક્તિને શારીરિક ઇજા પહોંચાડવી એ ગંભીર ગુનો હોય છે. પોલીસે આ મામલે ઝડપી કાર્યવાહી કરીને ઉત્તમ દાખલો બંધ બેસાડ્યો હતો કે કાયદાનું ઉલ્લંઘન કરનારને સજા થશે.