જામનગર શહેરમાંથી એક અત્યંત દુઃખદ અને ચિંતાજનક સમાચાર સામે આવ્યા છે. જામનગર શહેરમાં શંકાસ્પદ ચાંદીપુરા વાઈરસના કારણે એક માસૂમ બાળકે પોતાનો જીવ ગુમાવ્યો છે. જામનગરની સુપ્રસિદ્ધ જીજી હોસ્પિટલમાં આ બાળકને ગંભીર હાલતમાં દાખલ કરવામાં આવ્યું હતું. હોસ્પિટલના બાળરોગ વિભાગના આઈસીયુ વોર્ડમાં નિષ્ણાત તબીબોની દેખરેખ હેઠળ બાળકની સઘન સારવાર ચાલી રહી હતી, પરંતુ તમામ પ્રયાસો છતાં માસૂમ જિંદગીને બચાવી શકાઈ નથી.
દિગ્જામ સર્કલ નજીક આવેલા રવિ પાર્ક વિસ્તારની ઘટના
આ કમનસીબ ઘટનાનો ભોગ બનેલું બાળક જામનગર શહેરના દિગ્જામ સર્કલ નજીક આવેલા રવિ પાર્ક વિસ્તારનું રહેવાસી હતું. તેની ઉંમર માત્ર 2 વર્ષની હતી. શુક્રવારના રોજ અચાનક બાળકની તબિયત વધુ લથડતા પરિવારજનો તેને તાત્કાલિક હોસ્પિટલ લઈ દોડ્યા હતા. બાળકમાં જોવા મળેલા ચિહ્નોના આધારે તબીબોને ચાંદીપુરા વાઇરસ હોવાની પ્રબળ શંકા ગઈ હતી, જેને પગલે તાબડતોબ તેના સેમ્પલ લઈને લેબોરેટરીમાં તપાસ અર્થે મોકલવામાં આવ્યા હતા.
મેડિકલ રિપોર્ટ આવે તે પહેલા જ માસૂમે તોડ્યો દમ
તબીબી પ્રક્રિયા અનુસાર, બાળકના શરીરમાંથી લેવામાં આવેલા સેમ્પલનો લેબોરેટરી રિપોર્ટ આવે તે પહેલા જ બાળકની તબિયત વધુ નાજુક બની ગઈ હતી અને સારવાર દરમિયાન જ તેણે હોસ્પિટલના બિછાને દમ તોડી દીધો હતો. બાળકના અકાળે અવસાનથી પરિવારમાં ભારે આક્રંદ છવાઈ ગયું છે. તબીબોના જણાવ્યા અનુસાર, લેબોરેટરીનો સત્તાવાર રિપોર્ટ આવ્યા બાદ જ આ મોત ચાંદીપુરા વાઈરસના કારણે જ થયું છે કે કેમ તેની ચોક્કસ પુષ્ટિ થઈ શકશે.
https://twitter.com/sandeshnews/status/2078532653847118061
કેસ સામે આવતા જ સ્થાનિક આરોગ્ય વિભાગ સતર્ક મોડમાં
આ શંકાસ્પદ કેસ અને બાળકના મોતના પગલે જામનગરનું આરોગ્ય તંત્ર તાત્કાલિક હરકતમાં આવી ગયું છે. તંત્ર દ્વારા રવિ પાર્ક અને તેની આસપાસના વિસ્તારોમાં સેનિટાઈઝેશન, દવાનો છંટકાવ અને સર્વેલન્સની કામગીરી શરૂ કરવાની તજવીજ હાથ ધરાઈ છે. વાયરસનો ફેલાવો અટકાવવા અને અન્ય બાળકો સુરક્ષિત રહે તે માટે આરોગ્ય વિભાગે સ્થાનિક લોકોને પણ તકેદારી રાખવા અને લક્ષણો જણાય તો તુરંત સરકારી હોસ્પિટલનો સંપર્ક કરવા અપીલ કરી છે.
આ પણ વાંચો - Jamnagar: ચાંદીપુરા વાયરસની આશંકાથી જી.જી. હોસ્પિટલમાં 3 માસૂમ બાળકો ગંભીર હાલતમાં દાખલ
