Junagadhના વિજાપુર ગામમાં મોડી રાત્રે સિંહ લટાર મારતો CCTVમાં જોવા મળ્યો

ગીર સોમનાથના જંગલ વિસ્તારની નજીક આવેલા જૂનાગઢના વિજાપુર ગામમાં મોડી રાત્રે એક સિંહ ગામમાં આવી ચડ્યો હતો. જેના કારણે લોકોમાં ભય અને કુતૂહલનો માહોલ સર્જાયો હતો. આ ઘટનાના સીસીટીવી ફૂટેજ સામે આવ્યા હતા. જેમાં સિંહ ગામના રસ્તાઓ પર લટાર મારતો સ્પષ્ટપણે દેખાયો હતો. આ ઘટના ગત મોડી રાત્રિ દરમિયાન બની હતી. સીસીટીવી ફૂટેજમાં જોઈ શકાય છે કે સિંહ ગામની શેરીઓમાંથી પસાર થઈ રહ્યો છે. આ દરમિયાન એક ગાય પણ તેની સામે આવી ગઈ હતી.

મોડી રાત્રે સિંહ ગામમાં આવી ચડ્યો

સિંહ અને ગાય એકબીજાની સામે આવતા જ ગાય ગભરાઈ ગઈ હતી અને ત્યાંથી ભાગી ગઈ હતી. સિંહ પણ કોઈ પણ પ્રકારનું આક્રમક વલણ અપનાવ્યા વગર શાંતિથી પોતાની રીતે ચાલી રહ્યો હતો. આ ઘટનાથી ગામના લોકોમાં ભયનો માહોલ ફેલાયો હતો. ગ્રામજનોનું કહેવું હતું કે આ વિસ્તાર જંગલની નજીક હોવાથી સિંહ જેવા વન્ય પ્રાણીઓ ખોરાક અને પાણીની શોધમાં ઘણીવાર ગામની સીમમાં કે ગામ સુધી આવી જતા હોય છે.

ગામમાં ફરતા સિંહના CCTV આવ્યા સામે

પરંતુ આ રીતે ગામમાં લટાર મારતા સિંહના દ્રશ્યો ચિંતાજનક છે. આ સીસીટીવી ફૂટેજ સામે આવ્યા બાદ વન વિભાગને જાણ કરવામાં આવી હતી. વન વિભાગ દ્વારા આ વિસ્તારમાં પેટ્રોલિંગ વધારવામાં આવે અને સિંહ ફરી ગામમાં ન આવે તે માટે જરૂરી પગલાં ભરવામાં આવે તેવી ગ્રામજનો દ્વારા માગણી કરવામાં આવી હતી. લોકોએ પોતાના બાળકો અને પશુધનની સુરક્ષા માટે પણ ચિંતા વ્યક્ત કરી હતી અને વન વિભાગે આ બાબત પર ધ્યાન આપવું જોઈએ તેવી અપીલ કરી હતી.