જૂનાગઢના ઇતિહાસ પ્રસિદ્ધ અને આસ્થાના પ્રતિક સમાન ગિરનાર પર્વતની યાત્રાએ આવેલા એક પ્રવાસી સાથે દુર્ઘટના ઘટી હોવાના અહેવાલ સામે આવ્યા છે. પ્રાપ્ત વિગતો મુજબ, બેંગલુરુથી ગિરનારની યાત્રા કરવા આવેલા એક પ્રવાસી વહેલી સવારે પગપાળા હજારો સીડીઓ ચડીને ગિરનાર પર્વત પર પહોંચ્યા હતા. તેઓ ગૌરક્ષનાથ ટૂંકના દર્શન કરીને પરત ફરી રહ્યા હતા તે દરમિયાન અચાનક તેમની તબિયત ભારે લથડી ગઈ હતી. પ્રાથમિક અનુમાન મુજબ તેમનું મૃત્યુ હાર્ટ એટેક (હૃદયરોગના હુમલા) ના કારણે થયું હોવાની આશંકા વ્યક્ત કરવામાં આવી રહી છે.
108 એમ્બ્યુલન્સ દ્વારા સિવિલ હોસ્પિટલ ખસેડાયા
પ્રવાસીની તબિયત બગડ્યાની જાણ થતા જ સ્થળ પર દોડી આવેલા રોપવે કર્મચારીઓ દ્વારા તાત્કાલિક માનવતા દાખવીને ટ્રોલી મારફતે તેમને નીચે ઉતારવામાં આવ્યા હતા. નીચે લાવ્યા બાદ તેમને તાત્કાલિક પ્રાથમિક સારવાર આપવાના ભાગરૂપે સીપીઆર (CPR) આપીને જીવ બચાવવાના અથાગ પ્રયાસો કરવામાં આવ્યા હતા. આ સાથે જ તાત્કાલિક 108 એમ્બ્યુલન્સને જાણ કરીને તેમને જૂનાગઢની સરકારી સિવિલ હોસ્પિટલ ખાતે ખસેડવામાં આવ્યા હતા, જ્યાં ડ્યુટી પરના તબીબોએ તેમની તપાસ કરી હતી.