જૂનાગઢ જિલ્લામાં ખેડૂતોને રાહત પેકેજના ફોર્મ ભરવાના નામે પૈસા ઉઘરાવવાની જે ગેરરીતિ સામે આવી હતી, તે મુદ્દે સંદેશ ન્યૂઝના અહેવાલની તાત્કાલિક અસર જોવા મળી છે. તંત્રએ આ મામલાની ગંભીર નોંધ લીધી છે અને ત્વરિત કાર્યવાહી હાથ ધરી છે. આ સમગ્ર મામલે જિલ્લાના TDO (તાલુકા વિકાસ અધિકારી) રાજેન્દ્રકુમારે તાત્કાલિક અસરથી તપાસના આદેશ આપ્યા છે.
TDOએ કાર્યવાહીની ખાતરી આપી
તેમણે ખાતરી આપી છે કે તપાસ રિપોર્ટ આવ્યા બાદ ગેરરીતિમાં સંડોવાયેલા ખાનગી દુકાન સંચાલક અને વીસીઈ (VCE - Village Computer Entrepreneur) સામે કડક કાયદેસરની કાર્યવાહી કરવામાં આવશે. અધિકારીએ વધુમાં જણાવ્યું હતું કે, ખેડૂતોને ફોર્મ ભરવાની પ્રક્રિયામાં કોઈ મુશ્કેલી ન પડે તે માટે તંત્ર દ્વારા વૈકલ્પિક વ્યવસ્થા ઊભી કરવાની ખાતરી આપવામાં આવી છે, જેથી ખેડૂતોને નિ:શુલ્ક અને સરળતાથી સહાય મળી શકે. આ પગલું દર્શાવે છે કે વહીવટી તંત્ર ખેડૂતોના હિત માટે કટિબદ્ધ છે અને ગેરરીતિ ચલાવી લેવાશે નહીં.
