જૂનાગઢ જિલ્લામાંથી એક હૃદયદ્રાવક અકસ્માતના સમાચાર સામે આવ્યા છે. માંગરોળ-પોરબંદર હાઇવે પર પૂરઝડપે આવી રહેલી ટ્રક અને રીક્ષા વચ્ચે જોરદાર ટક્કર થવાથી ગમખ્વાર અકસ્માત સર્જાયો હતો. આ અકસ્માત એટલો ભયાનક હતો કે, રિક્ષાના ફૂરચેફૂરચા ઉડી ગયા હતા.
રિક્ષા ચાલકનું ઘટના સ્થળે જ મોત
પ્રાપ્ત વિગતો અનુસાર, અકસ્માત બાદ ટ્રક ચાલકે વાહન પરથી કાબૂ ગુમાવી દીધો હતો, જેના કારણે બેકાબૂ બનેલી ટ્રક રોડ પર જ પલટી મારી ગઈ હતી. આ અકસ્માતમાં રિક્ષા ચાલકનું ગંભીર ઇજાઓને કારણે ઘટના સ્થળે જ કરુણ મોત નીપજ્યું હતું. અચાનક બનેલી આ ઘટનાને પગલે આસપાસના લોકો મોટી સંખ્યામાં ઘટના સ્થળે દોડી આવ્યા હતા અને રોડ પર લોકોનાં ભારે ટોળાં ઉમટી પડ્યા હતા.


