સૌરાષ્ટ્રમાં ગેરકાયદે બાયોડીઝલના કાળા કારોબારને નાબૂદ કરવા માટે સ્ટેટ મોનિટરિંગ સેલ દ્વારા એક મોટી અને સપાટાબંધ કાર્યવાહી કરવામાં આવી છે. એસએમસીની ટીમ દ્વારા બાતમીના આધારે જૂનાગઢ જિલ્લામાં અલગ-અલગ 3 સ્થળો પર એકસાથે રેડ કરવામાં આવી હતી. પોલીસની આ ઓચંતી કાર્યવાહીને પગલે ગેરકાયદે ઇંધણનું વેચાણ કરતા માફિયાઓમાં ભારે ફફડાટ વ્યાપી ગયો છે.
રૂપિયા 2.13 કરોડથી વધુનો મુદ્દામાલ જપ્ત
આ રેડ દરમિયાન પોલીસે ઘટના સ્થળેથી મોટા પાયે ગેરકાયદે પ્રવૃત્તિનો પર્દાફાશ કર્યો છે. કાર્યવાહી દરમિયાન કુલ 30,970 લીટર શંકાસ્પદ જ્વલનશીલ બાયોડીઝલનો જથ્થો મળી આવ્યો હતો, જેને જપ્ત કરવામાં આવ્યો છે.
આ ઉપરાંત ઇંધણની હેરાફેરી અને સંગ્રહ કરવા માટે ઉપયોગમાં લેવાતા 15 વાહનો, 9 મોટા ટાંકા, ઇલેક્ટ્રિક મોટરો સહિત અન્ય સાધનો મળીને કુલ રૂપિયા 2.13 કરોડથી વધુની કિંમતનો મુદ્દામાલ પોલીસે કબ્જે લીધો છે.
ચોરવાડ અને માણાવદરમાં ગુના દાખલ
આ સમગ્ર કૌભાંડમાં સંડોવાયેલા 8 આરોપીઓની પોલીસે સ્થળ પરથી ધરપકડ કરી લીધી છે, જ્યારે આ નેટવર્ક સાથે જોડાયેલા અન્ય 5 આરોપીઓ હજુ પણ ફરાર છે, જેમને વોન્ટેડ જાહેર કરાયા છે.
આ ગેરકાયદે કાળા બજાર અંગે જૂનાગઢ જિલ્લાના ચોરવાડ અને માણાવદર પોલીસ સ્ટેશનમાં અલગ-અલગ કાયદેસરના ગુના નોંધીને એસએમસી અને સ્થાનિક પોલીસે આગળની તપાસના ચક્રો ગતિમાન કર્યા છે.
આ પણ વાંચો - Junagadh News: માંગરોળના દિવાસા ગામની ગૌચર જમીન પર ગેરકાયદે ખનન, સરપંચે કરી લેખિત રજૂઆત
