સાબરમતી નદીના ઉપરવાસમાં થયેલા ભારે વરસાદ અને ધરોઈ ડેમમાંથી પાણી છોડવામાં આવતા, ખેડા અને માતર તાલુકાના અનેક ગામોને એલર્ટ પર મૂકવામાં આવ્યા છે. નદીની સપાટીમાં વધારો થતા નીચાણવાળા વિસ્તારોમાં પૂર જેવી પરિસ્થિતિ સર્જાઈ શકે છે. ખેડા તાલુકાના ચલીન્દ્રા, ચિત્રાસર, ધરોડા, કઠવાડા, કલોલી, નવાગામ, નાયકા, રઢુ, રસિકપુરા, વારસંગ, વાસણા બુઝર્ગ, સમાદરા અને હરીયાળા જેવા ગામોને એલર્ટ કરવામાં આવ્યા છે.


માતર તાલુકામાં પણ સાવચેતીના પગલાં

ખેડાની જેમ જ, માતર તાલુકાના ગામોને પણ સાવચેત રહેવા માટે સૂચનાઓ આપવામાં આવી છે. માતર, અસામલી, પાલ્લા, બરોડા, પીપરીયા, મહેલજ, આંત્રોલી, વણસર અને કોશિયલ ગામોને પણ તંત્ર દ્વારા એલર્ટ કરવામાં આવ્યા છે. આ ગામો સાબરમતી નદીના કાંઠા નજીક આવેલા હોવાથી પૂરનું જોખમ વધુ છે. સ્થાનિક તંત્ર દ્વારા પરિસ્થિતિ પર સતત નજર રાખવામાં આવી રહી છે અને લોકોને સુરક્ષિત સ્થળે ખસી જવા માટે અપીલ કરવામાં આવી છે.

Also Read

તંત્ર દ્વારા લોકોને સાવધ રહેવા સૂચના

સાબરમતી નદીમાં પાણીની આવક વધતા જ તંત્રએ તાત્કાલિક પગલાં ભર્યા છે. લોકોને નદી કિનારે ન જવા અને જરૂર જણાય તો તાત્કાલિક સલામત સ્થળે જતા રહેવા માટે સૂચના આપવામાં આવી છે. આ વિસ્તારોના લોકોએ માલસામાન અને પશુધનને પણ સુરક્ષિત જગ્યાએ ખસેડવું જરૂરી છે. તંત્ર દ્વારા રાહત અને બચાવ કામગીરી માટે ટીમોને પણ સ્ટેન્ડબાય રાખવામાં આવી છે.


  • Follow us on: