શહેરના કાગડાપીઠ પોલીસ સ્ટેશન હેઠળ આવતા બહેરામપુરા વિસ્તારમાં ગત રાત્રે ચકચારી હત્યાની ઘટના બની છે. બહેરામપુરા પોલીસ ચોકીની નજીક જ 19 વર્ષીય યુવાન હિમેશ પરમારની અજાણ્યા શખ્સોએ ધારદાર હથિયારના ઘા ઝીંકી હત્યા કરી દેતા સમગ્ર વિસ્તારમાં સનસનાટી મચી ગઈ છે.
પોલીસ ચોકી પાસે જ હત્યાનો બનાવ
મળતી માહિતી મુજબ, આ લોહીયાળ ઘટના ગત રાત્રે અંદાજે 10:00 વાગ્યાની આસપાસ બની હતી. મૃતક હિમેશ પરમાર પોતાનું વાહન લઈને બહેરામપુરા પોલીસ ચોકી પાસેથી પસાર થઈ રહ્યો હતો, તે દરમિયાન અજાણ્યા હુમલાખોરોએ તેને નિશાન બનાવ્યો હતો. યુવાનો વચ્ચે અંદરોઅંદર થયેલી કોઈ બબાલને કારણે આ હિંસક હુમલો કરવામાં આવ્યો હોવાનું પ્રાથમિક દ્રષ્ટિએ જણાઈ રહ્યું છે. હુમલાખોરોએ હિમેશ પર ધારદાર હથિયારો વડે અનેક ઘા ઝીંક્યા હતા, જેના કારણે તેનું ઘટનાસ્થળે જ કરુણ મોત નીપજ્યું હતું.
