Ahmedabad: એરપોર્ટ પર જાપાનથી લાવેલી 25 લાખની 61 ડિઝાઈનર પેન ઝડપાઈ, કસ્ટમ્સ વિભાગની મોટી કાર્યવાહી

અમદાવાદના સરદાર વલ્લભભાઈ પટેલ ઈન્ટરનેશનલ એરપોર્ટ પર કસ્ટમ્સ વિભાગે બાતમી અને સતર્કતાના આધારે મોટી કાર્યવાહી કરી છે. જાપાનથી અમદાવાદ ઉતરેલા એક મુસાફર પાસેથી કસ્ટમ્સ વિભાગે 61 કિંમતી ડિઝાઈનર પેન ઝડપી પાડી છે. આ પેનોની કુલ બજાર કિંમત અંદાજે ₹25 લાખ હોવાનું જાણવા મળ્યું છે.

સ્કેનિંગ દરમિયાન પકડાઈ ચોરી

મળતી માહિતી મુજબ, જાપાનથી ફ્લાઈટમાં આવેલો આ મુસાફર જ્યારે એરપોર્ટ પર કસ્ટમ્સ ક્લિયરન્સ માટે પહોંચ્યો ત્યારે સ્કેનિંગ દરમિયાન તેના સામાનમાં કેટલીક શંકાસ્પદ વસ્તુઓ દેખાઈ હતી. એક્સ-રે સ્કેનિંગમાં શંકાસ્પદ ઈમેજ જણાતા કસ્ટમ્સના અધિકારીઓએ મુસાફરને અટકાવી તેના સામાનની ઝીણવટભરી તપાસ હાથ ધરી હતી.

કસ્ટમ્સ ડ્યુટી ચોરીનો ઈરાદો

તપાસ દરમિયાન મુસાફર પાસેથી એક-બે નહીં પરંતુ કુલ 61 જેટલી અત્યંત મોંઘી અને ડિઝાઈનર પેનો મળી આવી હતી. આ પેનો કલેક્ટર્સ આઈટમ અથવા મોંઘી બ્રાન્ડની હોવાનું જણાયું છે. મુસાફરે આ કિંમતી જથ્થો કસ્ટમ્સ ડ્યુટી ભર્યા વગર છુપાવીને લાવવાનો પ્રયાસ કર્યો હતો, જેથી સરકારી ટેક્સની ચોરી કરી શકાય.

કાયદેસરની કાર્યવાહી

કસ્ટમ્સ વિભાગે તમામ 61 પેન જપ્ત કરી લીધી છે અને તેની ચોક્કસ કિંમત આંકવાની પ્રક્રિયા હાથ ધરી છે. આરોપી મુસાફર સામે કસ્ટમ્સ એક્ટ હેઠળ ગુનો નોંધી તેની અટકાયત કરવામાં આવી છે.

આ પણ વાંચો: Gujarat Local body election 2026: સુરત વોર્ડ નં. 4 માં અનોખું મતદાન, ડોક્ટરોની ટીમ અને એમ્બ્યુલન્સ સાથે દર્દીએ બૂથ પર પહોંચી સૌનું ધ્યાન ખેંચ્યું