અમદાવાદ શહેરમાં સ્વચ્છતા જાળવવા અને પ્રતિબંધિત પ્લાસ્ટિકના ઉપયોગ પર અંકુશ લાવવા માટે અમદાવાદ મ્યુનિસિપલ કોર્પોરેશનના સોલિડ વેસ્ટ મેનેજમેન્ટ વિભાગે સઘન ઝુંબેશ ચલાવી છે. ગંદકી ફેલાવતા અને નિયમોનું ઉલ્લંઘન કરતા એકમો સામે વિભાગ દ્વારા આકરા પગલાં લેવામાં આવ્યા છે.
950 એકમોમાં તપાસ, 900ને નોટિસ
સોલિડ વેસ્ટ વિભાગની ટીમે શહેરના જુદા જુદા વિસ્તારોમાં કુલ 950 એકમોમાં તપાસ હાથ ધરી હતી. આ તપાસ દરમિયાન ગંદકી અને પ્લાસ્ટિકના ઉપયોગ સંબંધિત નિયમોનો ભંગ થતો હોવાનું માલૂમ પડ્યું હતું. પરિણામે, નિયમ ઉલ્લંઘન કરનારા 900 એકમોને નોટિસ ફટકારવામાં આવી હતી.
રૂપિયા 2.97 લાખનો દંડ વસૂલ્યો
નોટિસ ફટકારવાની સાથે જ, વિભાગ દ્વારા આ એકમો પાસેથી સ્થળ પર જ દંડની વસૂલાત કરવામાં આવી હતી. આ કાર્યવાહીમાં કુલ રૂપિયા 2.97 લાખના દંડની વસૂલાત કરવામાં આવી છે, જે AMC દ્વારા સ્વચ્છતા પ્રત્યેની પ્રતિબદ્ધતા દર્શાવે છે.
નિયમ ભંગ બદલ 49 એકમો સીલ
તપાસ અને દંડની કાર્યવાહી ઉપરાંત, નિયમોનું ગંભીરતાથી ઉલ્લંઘન કરનારા એકમો સામે વધુ કડક પગલાં લેવામાં આવ્યા છે. વિભાગે નિયમનું ઉલ્લંઘન કરનાર 49 એકમોને સીલ કરી દીધા છે. AMCની આ કાર્યવાહી સ્પષ્ટ સંકેત આપે છે કે, શહેરમાં સ્વચ્છતા અને પર્યાવરણને નુકસાન પહોંચાડતા કૃત્યોને હવે કોઈપણ ભોગે સહન કરવામાં આવશે નહીં. આગામી સમયમાં પણ આવી કાર્યવાહી ચાલુ રહેશે તેવું સૂત્રો દ્વારા જાણવા મળી રહ્યું છે.
આ પણ વાંચો - Kutch News: કચ્છ પોલીસનો સપાટો, રાપરમાં દારૂની હેરાફેરી ઝડપાઈ, લાખોનો મુદ્દામાલ જપ્ત કરવામાં આવ્ચો
