અમદાવાદ શહેરની ઓળખ ગણાતી લાલ બસ AMTS ફરી એકવાર અકસ્માતને કારણે વિવાદમાં આવી છે. શહેરના ગોતા સીરામીક માર્કેટ પાસે એક બેફામ ગતિએ આવતી AMTS બસે રોડ પર જઈ રહેલા એકસાથે ત્રણ વાહનોને જોરદાર ટક્કર મારી હતી. આ ટ્રિપલ અકસ્માતને પગલે સમગ્ર વિસ્તારમાં અફરાતફરીનો માહોલ સર્જાયો હતો.
સદ્દનસીબે બાળકોનો ચમત્કારિક બચાવ
આ અકસ્માતની સૌથી ભયાનક બાબત એ હતી કે AMTS બસે જે ત્રણ વાહનોને અડફેટે લીધા, જેમાં એક સ્કૂલ વાન પણ સામેલ હતી. આ ઉપરાંત એક રિક્ષા અને એક ટેમ્પોને પણ બસે જોરદાર ટક્કર મારી હતી. સદ્દનસીબે અકસ્માત સમયે સ્કૂલ વાનમાં સવાર બાળકોને કોઇ પણ પ્રકારની ઇજા પહોંચી નથી. જે એક મોટી રાહતની વાત છે. વાનનો કાચ અને બોડીનો ભાગ ક્ષતિગ્રસ્ત થયો હોવા છતાં માસૂમ બાળકોનો આબાદ બચાવ થયો છે.
