અમદાવાદના એસ.જી. હાઈવે પર આવેલા ગોતા ઓવરબ્રિજ પર બુધવારે સર્જાયેલા ગમખ્વાર અકસ્માત મામલે એસ.જી. વન ટ્રાફિક પોલીસે મોટી કાર્યવાહી કરી છે. બે બાઈક સવારના જીવ લેનારા ડમ્પરના ચાલકની પોલીસે ધરપકડ કરી લીધી છે. પોલીસ તપાસમાં જે ચોંકાવનારો ખુલાસો થયો છે તે મુજબ, અકસ્માત સર્જનાર ડમ્પર ચાલક પાસે ડ્રાઈવિંગ લાયસન્સ પણ નહોતું.
ડ્રાઈવર અને માલિક સામે સકંજો
ટ્રાફિક પોલીસે સાણંદના બોળ ગામના રહેવાસી વિમલ ડોડીયારની ધરપકડ કરી છે. તપાસ દરમિયાન સામે આવ્યું કે વિમલ લાયસન્સ વગર જ રોડ પર ભારે વાહન હંકારી રહ્યો હતો. આ ગંભીર બેદરકારીને પગલે પોલીસે માત્ર ડ્રાઈવર જ નહીં, પરંતુ ડમ્પરના માલિક કેયુર બારોટ વિરુદ્ધ પણ ગુનો નોંધાયો છે. લાયસન્સ વગરના વ્યક્તિને વાહન સોંપવા બદલ માલિક સામે કાયદેસરની કાર્યવાહી હાથ ધરવામાં આવી છે.