અમદાવાદના પંડિત દિનદયાળ ઉપાધ્યાય ઓડિટોરિયમ ખાતે માનવ સેવા સંગ દ્વારા સંચાલિત "આનંદ નિકેતન, ભાડજ કેમ્પસ" દ્વારા તેના વાર્ષિક ઉત્સવની ભવ્ય ઉજવણી કરવામાં આવી હતી. આ વર્ષે કાર્યક્રમની થીમ “સારથી – જીવનના પાઠ, માધવના સાથ” રાખવામાં આવી હતી, જેનો મુખ્ય ઉદ્દેશ્ય ભગવાન શ્રીકૃષ્ણના શાશ્વત મૂલ્યોને આજના 'Gen Z' અને યુવા વિદ્યાર્થીઓ સુધી પહોંચાડવાનો હતો.
સાંસ્કૃતિક પ્રસ્તુતિઓ દ્વારા જીવન મૂલ્યોનો સંદેશ
કાર્યક્રમમાં વિદ્યાર્થીઓએ નૃત્ય, નાટ્ય અને સંગીતમય પ્રસ્તુતિઓ દ્વારા શ્રીકૃષ્ણના જીવનના વિવિધ પાસાઓને જીવંત કર્યા હતા. પ્રસ્તુતિઓ દ્વારા દર્શાવવામાં આવ્યું હતું કે, કેવી રીતે કૃષ્ણની શિક્ષાઓ આજે પણ ધર્મ, ધૈર્ય અને કર્તવ્યના માર્ગે ચાલવા માટે આધુનિક જીવનની સમસ્યાઓમાં માર્ગદર્શન પૂરું પાડે છે.
ગણમાન્ય મહાનુભાવોની ઉપસ્થિતિ
આ અવસરે રાજ્ય મંત્રી દર્શનાબેન વાઘેલા અને પૂર્વ મેયર પ્રતિભાબેન જૈન મુખ્ય અતિથિ તરીકે ઉપસ્થિત રહ્યા હતા. આ ઉપરાંત સંસ્થાપક કમલ મંગલ, ટ્રસ્ટી શિવકુમાર ચૌધરી અને પ્રિન્સિપાલ રચના ભટનાગરે મહેમાનોનું સ્વાગત કર્યું હતું. આધ્યાત્મિક વક્તા વિરુપક્ષા દાસજી, જૈનિલ શાહ (GCCI) અને ટેક્નોલોજી એક્સપર્ટ વિઝન રાવલે પણ હાજરી આપી વિદ્યાર્થીઓને પ્રોત્સાહિત કર્યા હતા.
આ કાર્યક્રમે સાબિત કર્યું કે, શિક્ષણની સાથે સાંસ્કૃતિક વારસાનું જ્ઞાન આપવું તે જ વિદ્યાર્થીઓના સર્વાંગી વિકાસની સાચી ચાવી છે. ઉપસ્થિત વાલીઓએ શાળાના આ મૂલ્યલક્ષી પ્રયાસની ભારે પ્રશંસા કરી હતી.
આ પણ વાંચો - Ahmedabad News: શેરબજારના નામે રૂ.55 લાખની ઠગાઈનો પર્દાફાશ; સાયબર ક્રાઇમે સુરતના જયસુખ જીવાણીની કરી ધરપકડ
