બગોદરા-રાજકોટ હાઈવે પર આજે એક હૃદયધ્રાવક ઘટના સામે આવી છે. હાઈવે પર પૂર ઝડપે જઈ રહેલી એક કારમાં અચાનક આગ ફાટી નીકળતા અફરાતફરી મચી ગઈ હતી. આ ઘટનામાં સૌથી ડરામણી બાબત એ હતી કે આગ લાગતાની સાથે જ કારની સેન્ટર લોક સિસ્ટમ જામ થઈ ગઈ હતી, જેના કારણે ચાલક અંદર જ ફસાઈ ગયો હતો. જોકે, સમયસૂચકતા વાપરી ચાલક મહામુસીબતે બહાર નીકળવામાં સફળ રહ્યો હતો.
ડાકોરથી કેશોદ જતી વખતે બની ઘટના
ઘટનાની મળતી માહિતી અનુસાર, કાર ચાલક ડાકોરથી કેશોદ તરફ જઈ રહ્યો હતો. આ દરમિયાન બગોદરા નજીક આવેલા ભોગાવા બ્રિજ પાસે કારના બોનેટમાંથી અચાનક ધુમાડા નીકળવા લાગ્યા હતા અને જોતજોતામાં આખી કાર આગની લપેટમાં આવી ગઈ હતી. હાઈવે પર પસાર થતા અન્ય વાહનચાલકો પણ આ દ્રશ્ય જોઈ સ્તબ્ધ થઈ ગયા હતા.
સેન્ટર લોક થતા જીવ જોખમમાં મુકાયો
આગની તીવ્રતા એટલી વધારે હતી કે, કારની ઈલેક્ટ્રિક સિસ્ટમ ખોરવાઈ ગઈ અને દરવાજાના સેન્ટર લોક થઈ ગયા. કારની અંદર ફસાયેલા ચાલકે બહાર નીકળવા માટે ભારે જહેમત ઉઠાવી હતી અને અંતે કાચ તોડી અથવા અન્ય રીતે મહામુસીબતે બહાર નીકળ્યો હતો. તેના બહાર નીકળ્યાની ગણતરીની મિનિટોમાં જ આખી કાર ભડભડ સળગી ઉઠી હતી.
ફાયર બ્રિગેડ આવે તે પહેલા બધું ખાખ
ઘટના અંગે ફાયર બ્રિગેડને જાણ કરવામાં આવી હતી, પરંતુ ફાયર ફાઈટરો સ્થળ પર પહોંચે તે પહેલા જ કાર સંપૂર્ણપણે બળીને ખાખ થઈ ગઈ હતી. સદનસીબે, આ મોટી દુર્ઘટનામાં કોઈ જાનહાનિ થઈ નથી. પ્રાથમિક અનુમાન મુજબ, શોર્ટ સર્કિટના કારણે કારમાં આગ લાગી હોવાનું મનાય છે. આ ઘટનાને પગલે હાઈવે પર થોડા સમય માટે ટ્રાફિક જામના દ્રશ્યો પણ સર્જાયા હતા.
આ પણ વાંચો - Ahmedabad : ઈન્સ્ટાગ્રામની માયાજાળ, ગોંડલથી કલકત્તા ભાગતી સગીરાને ટ્રેનમાંથી પોલીસે ઉતારી, કલાકોમાં દિલધડક રેસ્ક્યુ
